ഇടുക്കി : കൊക്കയാറില് കഴിഞ്ഞ ദിവസമുണ്ടായ ഉരുള്പൊട്ടലില് കാണാതായ മൂന്ന് വയസ്സുകാരന് സച്ചു ഷാഹുലിന്റെ മൃതദേഹം കണ്ടെത്തി. ഇതോടെ കൊക്കയാറിലെ ഉരുള്പൊട്ടലില് കാണാതായ മുഴുവന് പേരുടെയും മൃതദേഹം കണ്ടെത്തി.
ഇന്നലെ രാത്രിയോടെ അവസാനിപ്പിച്ച തിരച്ചില് സച്ചുവിനായി ഇന്ന് രാവിലെ മുതല് വീണ്ടും രക്ഷാപ്രവര്ത്തകര് തുടരുകയായിരുന്നു. പതിനൊന്നേ കാലോടെയാണ് സച്ചുവിന്റെ മൃതദേഹം കണ്ടെത്തിയത്.
വീട് ഇടിഞ്ഞ് കിടന്നിരുന്ന ഭാഗത്ത് നിന്നാണ് കുട്ടിയുടെ മൃതദേഹം കണ്ടെത്തിയത്. പോസ്റ്റുമോര്ട്ടത്തിനായി മൃതദേഹം ആശുപത്രിയിലേക്ക് മാറ്റി.കൊക്കയാറില് ഉരുള്പൊട്ടലില് മരിച്ച ഒരു കുടുംബത്തിലെ അഞ്ചുപേരടക്കം ആറുപേരുടെ മൃതദേഹം ഇന്നലെ തന്നെ കണ്ടെത്തിയിരുന്നു.
ബന്ധുവിന്റെ വിവാഹത്തിന് എത്തിയ ഫൗസിയ മക്കളായ അമീന് (10) അംന (7) സഹോദരന്റെ മക്കളായ അഫ്സാന, അഫിയാന, ചിറയില് ഷാജി എന്നിവരുടെ മൃതദേഹങ്ങളാണ് ഇന്നലെ കിട്ടിയത്.
