കശ്മീര് : ജമ്മു കശ്മീരില് ബിജെപി നേതാവിനെ ദുരൂഹ സാഹചര്യത്തില് മരിച്ച നിലയില് കണ്ടെത്തി. കത്വ ജില്ലയിലെ ഹിരാനഗറില് ഒരു മരത്തില് തൂങ്ങിമരിച്ച നിലയിലാണ് മൃതദേഹം കണ്ടെത്തിയത്. ഹിരാനഗര് സ്വദേശിയായ സോം രാജാണ് മരിച്ചത്. പ്രദേശവാസിയായ യുവാവാണ് ഇദ്ദേഹത്തിന്റെ മൃതദേഹം ആദ്യം കണ്ടെത്തിയത്. ഉടന് തന്നെ പോലീസില് വിവരം അറിയിച്ചു. മൃതദേഹം പോസ്റ്റ്മോര്ട്ടത്തിനായി ആശുപത്രിയിലേക്ക് മാറ്റിയതായി അധികൃതര് പറഞ്ഞു.
സോം രാജിന്റെ ശരീരത്തില് പലയിടത്തും രക്തക്കറ കണ്ടതും മരണത്തില് ദുരൂഹത വര്ധിപ്പിക്കുന്നു. കഴിഞ്ഞ മൂന്ന് ദിവസമായി ഇദ്ദേഹത്തെ കാണാനില്ലെന്ന് ബന്ധുക്കള് പരാതി നല്കിയിരുന്നു. ഈ പരാതിയിന്മേല് അന്വേഷണം നടക്കുന്നതിനിടെയാണ് മരിച്ച നിലയില് കണ്ടെത്തിയത്. സോം രാജിന്റെ മരണം കൊലപാതകമാണെന്ന് ബന്ധുക്കള് ആരോപിച്ചു. തങ്ങള്ക്ക് നീതി ഉറപ്പാക്കണമെന്നും ബന്ധുക്കള് ആവശ്യപ്പെട്ടു. സംസ്ഥാനത്തെ ബിജെപി നേതൃത്വവും വിശദമായ അന്വേഷണം ആവശ്യപ്പെട്ട് രംഗത്തെത്തി. സംഭവത്തില് പോലീസ് കേസെടുത്ത് അന്വേഷണം ആരംഭിച്ചു.
