തൃശ്ശൂർ : കൊടുങ്ങല്ലൂരിൽ വിവാഹ സൽക്കാരത്തിനിടെയുണ്ടായ തർക്കം വലിയ സംഘർഷത്തിൽ കലാശിച്ചു. അയൽവാസികൾ തമ്മിലുണ്ടായ വാക്കേറ്റമാണ് ഒടുവിൽ കൂട്ടത്തല്ലായി മാറിയത്. സൽക്കാരത്തിനെത്തിയവർ പരസ്പരം പാത്രങ്ങൾ വച്ചെറിഞ്ഞതിനെ തുടർന്ന് ഒരു കുട്ടി ഉൾപ്പെടെ നാലുപേർക്ക് പരിക്കേറ്റു. ഇന്നലെ നടന്ന വിവാഹ റിസപ്ഷനിടെയാണ് സംഭവം. അയൽവാസികൾ തമ്മിൽ ഒന്നോ രണ്ടോ കാര്യങ്ങൾ പറഞ്ഞ് തുടങ്ങിയ തർക്കം പിന്നീട് വലിയ ബഹളത്തിലേക്കും കൈയാങ്കളിയിലേക്കും മാറുകയായിരുന്നു.
സംഘർഷം രൂക്ഷമായതോടെ അവിടെയുണ്ടായിരുന്ന പാത്രങ്ങൾ എടുത്ത് പരസ്പരം എറിയുന്ന സാഹചര്യം ഉണ്ടായി. ഒടുവിൽ നാട്ടുകാർ ഇടപെട്ടാണ് രംഗം ശാന്തമാക്കിയത്. പരിക്കേറ്റ നാലുപേരെയും ഉടൻ തന്നെ ആശുപത്രിയിൽ പ്രവേശിപ്പിച്ചു. സംഭവത്തെക്കുറിച്ച് കൊടുങ്ങല്ലൂർ പോലീസ് അന്വേഷണം ആരംഭിച്ചിട്ടുണ്ട്. നിലവിൽ ആരും പരാതി നൽകിയിട്ടില്ലെന്നും പരാതി ലഭിക്കുന്ന മുറയ്ക്ക് കേസ് രജിസ്റ്റർ ചെയ്ത് നടപടികൾ സ്വീകരിക്കുമെന്നും പോലീസ് അറിയിച്ചു.
