തിരുവല്ല : പരുമല കാട്ടില് കിഴക്കതില് ഫ്രാന്സിസ് ബ്രൂണ് (വാവച്ചന്-53) കൊല്ലപ്പെട്ട കേസില് കുറ്റാരോപിതരെ കോടതി വെറുതെ വിട്ടു. കടപ്ര പുത്തന്പുരയില് ആന്റണി ഫിലിപ്പ് (55), സഹോദരപുത്രന് ജെനി ജോണ് (39), പിതാവ് പി.പി. ജോണ് (65) എന്നിവരെ പ്രതികളാക്കിയാണ് കേസ് രജിസ്റ്റര് ചെയ്തിരുന്നത്.
2016 മാര്ച്ച് 29ന് രാത്രി ഏഴിന് പരുമല പള്ളിക്ക് മുന്വശത്തു വെച്ച് ഫ്രാന്സിസ് ബൂണിന് ഇഷ്ടിക, തടിക്കഷ്ണം, ടോര്ച്ച് ഇവ ഉപയോഗിച്ച് തലയ്ക്ക് അടിച്ചു മാരകമായി പരിക്കേല്പ്പിക്കുകയും കോട്ടയം മെഡിക്കല് കോളേജില് ചികിത്സയിലിരിക്കേ മരിച്ചതുമായി ബന്ധപ്പെട്ടായിരുന്നു കേസ്.
തിരുവല്ല സര്ക്കിള് ഇന്സ്പെക്ടര് ചാര്ജ് ചെയ്ത കേസില് മൂന്നു പ്രതികളെയും നിരുപാധികം വിട്ടയച്ചുകൊണ്ട് പത്തനംതിട്ട അഡീഷണല് ജില്ലാ ജഡ്ജി കെ.എഫ്. മിനിമോളാണ് ഉത്തരവായത്. പരുമല സെന്റ് ഗ്രിഗോറിസ് ആശുപത്രിയിലെ ഡോ. ഏബ്രഹാം മാത്യു, കോട്ടയം മെഡിക്കല് കോളജിലെ ന്യൂറോളജി വിഭാഗം ഡോ.ബാലകൃഷ്ണന്, മെഡിക്കല് കോളജിലെ ഫോറന്സിക് വിഭാഗം പോലീസ് സര്ജന് ഡോ. വി.എസ്. വിപിന് തുടങ്ങി 27 -ഓളം സാക്ഷികളെ പ്രോസിക്യൂഷന് കോടതിയില് വിസ്തരിച്ചു. പ്രതികള്ക്കു വേണ്ടി അഭിഭാഷകരായ ബി. ശിവദാസ്, എസ്. പ്രസീദ്, മഹേഷ് ഭാനു, ജിതിന്. ജി. ദാസ്, അഭിജിത് എന്നിവര് ഹാജരായി.
