തിരുവനന്തപുരം: പതിനെട്ട് വയസിന് താഴെയുള്ള എല്ലാ ഭിന്നശേഷി കുട്ടികള്ക്കും സൗജന്യ സമഗ്ര ദന്തചികിത്സ ലഭ്യമാക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. ലോക വദനാരോഗ്യ ദിനാചരണത്തിന്റെ സംസ്ഥാനതല ഉദ്ഘാടനം തിരുവനന്തപുരം മാജിക് പ്ലാനറ്റില് നിര്വഹിച്ചു സംസാരിക്കവെയായിരുന്നു മന്ത്രി ഇക്കാര്യം പറഞ്ഞത്. എല്ലാതരത്തിലുള്ള മൈനറും മേജറുമായിട്ടുള്ള ഓറല് സര്ജറി പ്രൊസീജിയറുകള്, ഓര്ത്തോഗ്നാത്തിക് സര്ജറി, കോസ്മറ്റിക് സര്ജറി, മോണ സംബന്ധമായ പ്രശ്നങ്ങള്, ദന്തക്രമീകരണം, പല്ല് നഷ്ടപ്പെട്ട കുട്ടികള്ക്ക് പല്ല് വയ്ക്കല് തുടങ്ങിയ എല്ലാം സൗജന്യമായി ചെയ്തുകൊടുക്കുമെന്നും മന്ത്രി പറഞ്ഞു.
പ്രമേഹം രക്തസമ്മര്ദം, പക്ഷാഘാതം തുടങ്ങിയ വിവിധ രോഗങ്ങള് ദന്താരോഗ്യവുമായി ബന്ധപ്പെട്ടതാണ്. ദേശീയ ആരോഗ്യ പരിപാടിക്ക് കീഴില് ആരോഗ്യത്തിനും വദന സംരക്ഷണത്തിനും മാതൃകാപരമായ പ്രവര്ത്തനങ്ങളാണ് കേരളം നടത്തുന്നത്. ഭിന്ന ശേഷി വിദ്യാര്ഥികള്ക്കുള്ള സൗജന്യ വദനാരോഗ്യ പദ്ധതി ആദ്യമായി ഡോ. ഗോപിനാഥ് മുതുകാട് നേതൃത്വം നല്കുന്ന മാജിക് പ്ലാനെറ്റില് തുടങ്ങുന്നു എന്നുള്ളത് ഏറെ സന്തോഷകരമാണെന്നും മന്ത്രി അഭിപ്രായപ്പെട്ടു.
