ഡൽഹി : ഇന്ധനവില കുതിച്ചുയരുന്ന സാഹചര്യത്തിൽ പ്രതിഷേധിച്ച് രാജ്യത്തെ ഗിഗ് തൊഴിലാളികൾ ഇന്ന് അഞ്ച് മണിക്കൂർ പണിമുടക്കുന്നു. ഓൺലൈൻ ടാക്സി സർവീസുകൾ, ഡെലിവറി പ്ലാറ്റ്ഫോമുകൾ തുടങ്ങിയ വിവിധ സേവന മേഖലകളിൽ ജോലി ചെയ്യുന്ന തൊഴിലാളികളാണ് പ്രതിഷേധവുമായി രംഗത്തെത്തിയിരിക്കുന്നത്. പെട്രോൾ, ഡീസൽ വിലയിലുണ്ടായ അനിയന്ത്രിതമായ വർധനവ് തങ്ങളുടെ ഉപജീവനത്തെ സാരമായി ബാധിക്കുന്നു എന്നാണ് തൊഴിലാളികൾ വ്യക്തമാക്കുന്നത്.
പണിമുടക്കിന്റെ ഭാഗമായി രാവിലെ മുതൽ ടാക്സി, പാഴ്സൽ ഡെലിവറി സേവനങ്ങൾ തടസ്സപ്പെടാൻ സാധ്യതയുണ്ട്. ഓൺലൈൻ ടാക്സി ഡ്രൈവർമാരും മറ്റ് പ്ലാറ്റ്ഫോം തൊഴിലാളികളും സമരത്തിൽ പങ്കുചേരുന്നതിനാൽ നഗരങ്ങളിൽ യാത്രക്കാർക്കും സാധനങ്ങൾ ഓർഡർ ചെയ്യുന്നവർക്കും ബുദ്ധിമുട്ട് നേരിട്ടേക്കാം.
കഴിഞ്ഞ ദിവസമാണ് പെട്രോളിനും ഡീസലിനും വില കൂട്ടിയത്. മൂന്ന് രൂപയാണ് വർധിച്ചത്. ഇതോടെ ഒട്ടുമിക്ക സംസ്ഥാനങ്ങളിലും ഒരു ലിറ്റർ പെട്രോളിന് 100 രൂപയുടെ മുകളിലായി നിരക്ക്. ഇതിന് പുറമെ സി എൻ ജി യുടെയും നിരക്കിൽ വർദ്ധനവ് ഉണ്ടായിട്ടുണ്ട്.
