ദില്ലി : അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പില് കനത്ത തിരിച്ചടി നേരിട്ട പശ്ചാത്തലത്തില് വൈകീട്ട് കോണ്ഗ്രസ് പ്രവര്ത്തക സമിതി യോഗം ചേരാനിരിക്കെ ജി-23 നേതാക്കള് കോണ്ഗ്രസ് സ്ഥിരം അധ്യക്ഷനുവേണ്ടി വാദിച്ചേക്കും. കോണ്ഗ്രസിന് സ്ഥിരം അധ്യക്ഷന് വേണമെന്ന നിലപാടില് ഉറച്ചുനില്ക്കുകയാണ് ജി-23 നേതാക്കള്. അധ്യക്ഷ പദവി ഒഴിയാന് സോണിയാ ഗാന്ധി തയ്യാറായാല് എതിര്ക്കേണ്ടെന്നാണ് ജി 23 നേതാക്കളുടെ തീരുമാനം.
ശശി തരൂരിനെയോ മുകുള് വാസ്നിക്കിനെയോ അധ്യക്ഷനായി നിര്ദേശിക്കുമെന്ന് സൂചനയുണ്ട്. രണ്ടായിരത്തിന്റെ തുടക്കത്തില് സോണിയ ഗാന്ധി അധ്യക്ഷയായ സമയത്തുണ്ടായിരുന്ന പ്രവര്ത്തന രീതിയാണ് ജി-23 നേതാക്കള് പ്രതീക്ഷിക്കുന്നത്. പാര്ട്ടിയുടെ നന്മയാണ് ആഗ്രഹിക്കുന്നതെന്നും തങ്ങള് പാര്ട്ടിയുടെ ശത്രുക്കളല്ലെന്നുമാണ് ഈ നേതാക്കള് വ്യക്തമാക്കിയിരിക്കുന്നത്.
