ന്യൂഡൽഹി : വികസിത് ഭാരതമെന്ന ലക്ഷ്യത്തിലൂന്നി രാജ്യത്തെ ബാങ്കിങ് സംവിധാനം പരിഷ്കരിക്കുന്നതിന്റെ ഭാഗമായി ഉന്നതതല സമിതി ഉടൻ പ്രഖ്യാപിക്കുമെന്ന് കേന്ദ്ര ധനമന്ത്രി നിർമല സീതാരാമൻ വ്യക്തമാക്കി. 2047ലെ വികസിത ഭാരത് സങ്കൽപത്തിന് അനുസൃതമായി ബാങ്കിങ് രംഗത്തെ മാറ്റുന്നതു പഠിക്കുകയാണ് ലക്ഷ്യം. കഴിഞ്ഞ ബജറ്റിൽ ധനമന്ത്രി നടത്തിയ പ്രഖ്യാപനമാണ് ഇപ്പോൾ നടപ്പാക്കാനൊരുങ്ങുന്നത്. ഡൽഹിയിൽ നടന്ന പൊതുമേഖലാ ബാങ്ക് മേധാവിമാരുടെ യോഗത്തിലാണ്, സമിതി സംബന്ധിച്ച പ്രഖ്യാപനം സർക്കാർ ഉടൻ നടത്തുമെന്ന് കേന്ദ്രമന്ത്രി പറഞ്ഞത്. സമിതിയുടെ അഭിപ്രായങ്ങളും നിർദേശങ്ങളും സർക്കാരിനു സമർപ്പിക്കും.
പൊതുമേഖലാ ബാങ്കുകളുടെ സ്വകാര്യവൽക്കരണവും ബാങ്ക് ലയനവും സമിതിയുടെ പരിഗണനാ വിഷയങ്ങളായേക്കും. എല്ലാവരിലേക്കും ബാങ്കിങ് സേവനം എത്തിക്കാനുള്ള ശ്രമങ്ങളെയും രാജ്യത്തിന്റെ താൽപര്യത്തെയും സ്വകാര്യവൽക്കരണം ബാധിക്കുമെന്ന ആശങ്കയ്ക്ക് അടിസ്ഥാനമില്ലെന്ന് നിർമല സീതാരാമൻ നേരത്തേ പറഞ്ഞിരുന്നു.
