തിരുവനന്തപുരം : പദ്ധതികളിലെ ഗുണനിലവാരം ഉറപ്പാക്കാൻ ചില നിർദ്ദേശങ്ങൾ കിഫ്ബി മുന്നോട്ടു വെച്ചിട്ടുണ്ടെന്ന് പൊതുമരാമത്ത് മന്ത്രി പി.എ മുഹമ്മദ് റിയാസ് പറഞ്ഞു. മരാമത്ത് വകുപ്പിനാണ് കിഫ്ബി കൂടുതൽ തുക അനുവദിച്ചത്. കിഫ്ബിയുടെ എല്ലാ മാനദണ്ഡങ്ങളും മാറ്റാനാകില്ല. എംഎൽഎമാർ പ്രശ്നങ്ങൾ ശ്രദ്ധയിൽപ്പെടുത്തിയിട്ടുണ്ട്.
പദ്ധതികൾ വേഗത്തിലാക്കാൻ ജൂലൈ 27ന് ചേർന്ന യോഗം തീരുമാനിച്ചിട്ടുണ്ട്. പദ്ധതികൾ വേഗത്തിലാക്കാൻ സർവേ വകുപ്പിനു കീഴിൽ തന്നെ സർവെയർമാരെ താൽക്കാലികമായി നൽകണമെന്നും മന്ത്രി പറഞ്ഞു. എന്നാൽ സ്വതന്ത്രമായി സർവേയർമാരെ അനുവദിക്കാനാകില്ലെന്നു റവന്യൂ മന്ത്രി കെ.രാജൻ പറഞ്ഞു. സ്വതന്ത്ര സർവേ സംവിധാനം അംഗീകരിക്കാനാകില്ല. കൂടുതൽ സർവേയർമാരെ ലഭ്യമാക്കാൻ നടപടി സ്വീകരിച്ചിട്ടുണ്ടെന്നും മന്ത്രി പറഞ്ഞു.
റവന്യൂ വകുപ്പുമായി ആലോചിച്ചു സർവെയർമാരെ എടുക്കണം എന്നാണ് താൻ പറഞ്ഞതെന്നും റവന്യൂ മന്ത്രി മനസ്സിലാക്കിയതിലെ തെറ്റായിരിക്കാമെന്നും പൊതുമരാമത്ത് മന്ത്രി വിശദീകരിച്ചു. കിഫ്ബി പദ്ധതികൾ അവലോകനം ചെയ്യാൻ പൊതുമരാമത്ത് ഉദ്യോഗസ്ഥർ മാസത്തിലൊരിക്കൽ യോഗം ചേരുമെന്നും മന്ത്രി പറഞ്ഞു.
