കൊല്ലം: വീടുകളില് കറങ്ങി നടന്ന് മോഷണം നടത്തുന്ന തമിഴ് നാടോടി സംഘം ഓച്ചിറയില് പിടിയില്. സേലം കക്കപ്പാളയം സ്വദേശികളായ ലക്ഷ്മി, മാരി, കൗസല്യ എന്നിവരാണ് പോലീസിന്റെ പിടിയിലായത്. ആക്രി സാധനങ്ങള് ശേഖരിക്കാന് എന്ന വ്യാജേന വീടുകള് കേന്ദ്രീകരിച്ച് മോഷണം നടത്തിവന്ന തമിഴ്നാടോടി സംഘത്തെയാണ് മോഷണ ശ്രമത്തിനിടെ പിടികൂടിയത്.
ചങ്ങന്കുളങ്ങര ശ്രീമന്ദിരത്തില് വിനോദിന്റെ വീടിനോട് ചേര്ന്നുള്ള ഷെഡ്ഡില് മോഷണം നടത്താനുള്ള ശ്രമത്തിനിടെയാണ് ഇവരെ നാട്ടുകാരും പോലീസും ചേര്ന്ന് പിടികൂടിയത്.
കൊല്ലം ജില്ലയുടെ മറ്റ് ഭാഗങ്ങളിലും മറ്റു ജില്ലകളിലും നടന്ന മോഷണങ്ങളില് ഇവര്ക്ക് പങ്കുണ്ടോയെന്നും അന്വേഷിച്ച് വരികയാണെന്ന് ഓച്ചിറ പോലീസ് പറഞ്ഞു. ബസുകളിലും മറ്റ് തിരക്കുള്ള സ്ഥലങ്ങളിലും സ്ത്രീകളുടെയും കുട്ടികളുടെയും സ്വര്ണാഭരണങ്ങളും പേഴ്സും മോഷണം പോകുന്നത് പതിവായിരുന്നു. അത്തരം സ്ഥലങ്ങളിലെല്ലാം തമിഴ് നാടോടി സ്ത്രീകളുമുണ്ടായിരുന്നു.
കൃത്യമായ മേല്വിലാസമോ മറ്റു വിവരങ്ങളോ ഇല്ലാത്തതിനാല് ഇവരെ കണ്ടെത്താനും കഴിഞ്ഞിരുന്നില്ല. നാടോടികളുടെ കൂട്ടമായി എത്തുന്ന ഇവര് മൂന്നും നാലും പേരുള്ള സംഘങ്ങളായി തിരിഞ്ഞ് പലസ്ഥലങ്ങളിലാണ് മോഷണം നടത്തുന്നത്. ഇവരോടൊപ്പം പുരുഷന്മാര് ഉണ്ടാകാറില്ല.കൊല്ലം ജില്ലയുടെ മറ്റ് ഭാഗങ്ങളിലും മറ്റു ജില്ലകളിലും നടന്ന മോഷണങ്ങളില് ഇവര്ക്ക് പങ്കുണ്ടോ എന്ന കാര്യം കൂടുതല് അന്വേഷിച്ചു വരികയാണെന്ന് ഓച്ചിറ പോലീസ് സ്റ്റേഷന് ഇന്സ്പെക്ടര് നിസാമുദ്ദീന് അറിയിച്ചു. പ്രതികളെ കരുനാഗപ്പള്ളി ഒന്നാം ക്ലാസ് ജുഡീഷ്യല് മജിസ്ട്രേറ്റ് കോടതിയില് ഹാജരാക്കി റിമാന്ഡ് ചെയ്തു.
