തിരുവനന്തപുരം: കുപ്രസിദ്ധ ഗുണ്ടാ- ലഹരി മാഫിയ തലവന് കമ്പി റാഷിദ് എന്ന മുഹമ്മദ് റാഷിദ് പോലീസ് പിടിയില്. ഇയാളുടെ പക്കല് നിന്നും വടിവാള് ഉള്പ്പെടെയുള്ള ആയുധങ്ങളും പിടിച്ചെടുത്തു. നെടുമങ്ങാട് എക്സൈസ് സര്ക്കിള് ബിആര് സുരൂപിന്റെ നേതൃത്വത്തിലാണ് ഇയാളെ പിടികൂടിയത്. ഇയാളുടെ പക്കല് നിന്നും വില്പ്പനയ്ക്കായി കവറുകളില് സൂക്ഷിച്ചിരുന്ന 17.21 ഗ്രാം എംഡിഎംഎ, 50 ഗ്രാം കഞ്ചാവ് എന്നിവയും പണവും പിടിച്ചെടുത്തു. വടിവാള്, എയര് ഗണ് എന്നിവ ഇയാളില് നിന്നും പിടിച്ചെടുത്തു.
വെമ്പായം, തേക്കട, വെഞ്ഞാറമൂട്, കന്യാകുളങ്ങര, വട്ടപ്പാറ തുടങ്ങിയ പ്രദേശങ്ങള് കേന്ദ്രീകരിച്ച് എംഡിഎംഎ ഉള്പ്പെടെയുള്ള മാരകലഹരി മരുന്നുകള് ഇയാള് വില്ക്കാറുണ്ട്. ഇതുമായി ബന്ധപ്പെട്ട് നിരവധി കേസുകളും ഇയാള്ക്കെതിരെ രജിസ്റ്റര് ചെയ്തിട്ടുണ്ട്. ഇതേ തുടര്ന്ന് ഇയാള്ക്കായി നെടുമങ്ങാട് എക്സൈസ് അന്വേഷണം ആരംഭിക്കുകയായിരുന്നു. എംഡിഎംഎ ഉള്പ്പെടെയുള്ള സിന്തറ്റിക് ഡ്രഗ്സ് വില്പ്പന നടത്തുന്ന ഗ്യാംങ്ങിലെ പ്രധാനിയാണ് അറസ്റ്റിലായ റാഷിദ്.
