പത്തനംതിട്ട : ജില്ലയിലെ വിവിധ തദ്ദേശ സ്വയംഭരണ സ്ഥാപനങ്ങളുടെ കീഴില് പ്ലാസ്റ്റിക് മാലിന്യങ്ങള് ശേഖരിക്കാന് സ്ഥാപിച്ച മിനി മെറ്റീരിയല് കളക്ഷന് ഫെസിലിറ്റികളുടെ പരിസരങ്ങള് മാലിന്യകൂമ്പാരമായി മാറുന്നത് ദുര്ഗന്ധത്തോടൊപ്പം രോഗ ഭീതിയും വര്ധിപ്പിക്കുന്നു. തദ്ദേശ സ്വയംഭരണ സ്ഥാപനങ്ങളുടെ പരിധിയിലെ പ്ലാസ്റ്റിക് മാലിന്യ ശേഖരണത്തിനായാണ് മിനി എം.സി.എഫ് കള് സ്ഥാപിച്ചത്. ഗ്രാമ പഞ്ചായത്തുകളുടെയും നഗരസഭകളുടെയും പരിധിയില് സ്ഥാപിച്ച ഇത്തരം എം.സി.എഫ് കളില് ഹരിതകര്മ്മ സേനയുടെ നേതൃത്വത്തില് ശേഖരിച്ച മാലിന്യങ്ങളാണ് കൂടുതലും നിക്ഷേപിക്കുന്നത്.
എന്നാല് പുറത്ത് നിന്നുള്ള സ്വകാര്യ വ്യക്തികള് ചാക്കിലും കവറുകളിലുമാക്കിയ മാലിന്യങ്ങള് ഇത് സ്ഥാപിച്ചിരിക്കുന്നതിന് ചുറ്റും കൊണ്ടുവന്ന് ഉപേക്ഷിച്ചിട്ട് പോകുന്നതാണ് ഇപ്പോഴത്തെ പതിവ് കാഴ്ച. ചെറിയ ഒരു മഴ കൂടിപെയ്താല് ഇതില് വെള്ളം നിറയുകയും കൊതുകുകള് പെറ്റുപെരുകുകയും ചെയ്യും. പലപ്പോഴും ഇതില് ശേഖരിക്കപ്പെടുന്ന മാലിന്യങ്ങള് കൃത്യസമയങ്ങളില് നീക്കം ചെയ്യാറുമില്ല. ജില്ലയിലെ പല സ്ഥലങ്ങളിലും മാലിന്യം കുമിഞ്ഞു കൂടിയ മിനി എം.സി.എഫ് കള് കാട് കയറി കിടക്കുന്നതും കാണാം. പുനലൂര് – മൂവാറ്റുപുഴ സംസ്ഥാനപാതയില് മല്ലശേരിമുക്കിലും ഇത്തരത്തില് എം.സി.എഫ് ന് പുറത്ത് മാലിന്യം തള്ളിയിട്ടുണ്ട്.
ഇതിന്റെ അടുത്ത് പോലും ആളുകള് പോയിട്ട് കാലങ്ങള് ഏറെയായി. പലതും കാടുകളും വള്ളിപടര്പ്പുകളും കയറി കിടക്കാന് തുടങ്ങിയിട്ട് കാലങ്ങള് കഴിഞ്ഞു. ഇവിടെ ശേഖരിക്കുന്ന മാലിന്യങ്ങള് പിന്നീട് വലിയ മെറ്റീരിയല് കളക്ഷന് ഫെസിലിറ്റികളിലേക്ക് മാറ്റുകയും അവിടെ നിന്നും തരം തിരിച്ച് പുനരുപയോഗത്തിനായി കൊണ്ടുപോവുകയുമാണ് പതിവ്. എന്നാല് ജില്ലയില് പലയിടത്തും ഇതൊന്നും കാര്യക്ഷമമായി നടക്കുന്നില്ല.
