കോന്നി : കോന്നി കെ.എസ്.ആര്.റ്റി.സി ബസ് ഓപ്പറേറ്റിംഗ് സ്റ്റേഷനില് മാലിന്യങ്ങള് കൂട്ടിയിട്ട് കത്തിക്കുന്നത് ജനങ്ങള്ക്ക് ബുദ്ധിമുട്ടാകുന്നതായി പരാതി. കോന്നി ഗ്രാമപഞ്ചായത്ത് പൊതു ശുചിമുറിക്ക് സമീപമാണ് പ്ലാസ്റ്റിക് മാലിന്യങ്ങള് ഉള്പ്പെടെ കൂട്ടിയിട്ട് കത്തിക്കുന്നത്. കുറച്ച് കാലങ്ങളായി ഇവിടെ കിടന്നിരുന്ന മാലിന്യങ്ങള് കഴിഞ്ഞ ദിവസമാണ് ഒന്നിച്ച് വാരിക്കൂട്ടുകയും അടുത്ത ദിവസം ഇത് കത്തിക്കുകയും ചെയ്തത്. പ്ലാസ്റ്റിക് അടക്കമുള്ള മാലിന്യങ്ങള് ഇതില് ഉണ്ടായിരുന്നതിനാല് ഇത് കത്തിയപ്പോഴുണ്ടായ ദുര്ഗന്ധം നിറഞ്ഞ പുക ബസ് സ്റ്റാന്റിലാകെ നിറയുകയും ചെയ്തു. ഇത് ബസ് കാത്ത് നിന്ന നിരവധി ആളുകള്ക്ക് ഇത് ബുദ്ധിമുട്ട് സൃഷ്ടിച്ചിരുന്നു. ആളുകള് ഇത് ചോദ്യം ചെയ്തതിനെ തുടര്ന്ന് കത്തിച്ച ജീവനക്കാരും നാട്ടുകാരും തമ്മില് വാക്കേറ്റമുണ്ടാവുകയും ചെയ്തു.
ഓപ്പറേറ്റിംഗ് സ്റ്റേഷനില് ഇത്തരത്തില് രാത്രികാലങ്ങളില് മാലിന്യം കത്തിക്കുന്ന സംഭവങ്ങള് വ്യാപകമാണ്. ഗ്രാമ പഞ്ചായത്ത് നിയന്ത്രണത്തിലുള്ള കംഫര്ട്ട് സ്റ്റേഷനിലെ പൈപ്പുകള് കാലപ്പഴക്കത്താല് പൊട്ടി മലിന ജലം സംസ്ഥാന പാതയിലേക്ക് ഒഴുകുവാന് തുടങ്ങിയിട്ട് കാലങ്ങള് കഴിഞ്ഞിട്ടും യാതൊരു നടപടിയും സ്വീകരിച്ചിട്ടില്ല. സ്റ്റാന്റില് എത്തുന്ന ആളുകള് ഈ മലിന ജലത്തില് ചവിട്ടിയാണ് നടക്കേണ്ടി വരുന്നത്.
