പത്തനംതിട്ട : കുമ്പഴ – മലയാലപ്പുഴ റോഡിൽ പൂന്തോട്ടമൊരുക്കി നഗരസഭ ആരോഗ്യ കാര്യ സ്ഥിരം സമിതി അധ്യക്ഷൻ ജെറി അലക്സ്. കാടു കയറുന്നതിനും മാലിന്യ നിക്ഷേപത്തിനും പരിഹാരമായി കുമ്പഴ മലയാലപ്പുഴ റോഡിൽ പൂച്ചെടികളും വൃക്ഷങ്ങളും തണൽമരങ്ങൾ വെച്ചുപിടിപ്പിക്കാൻ ആരംഭിച്ചു. കഴിഞ്ഞവർഷം 50ബഡ്ഡ് പേര തൈകൾ നട്ടിരുന്നു. അതിൽ പകുതിയിലേറെയും സാമൂഹ്യവിരുദ്ധർ നശിപ്പിച്ചു. ബാക്കിയുള്ളവ കായ്കൾ ആയി തുടങ്ങി. സാമൂഹ്യ വിരുദ്ധർ നശിപ്പിച്ച തൈകൾക്ക് പകരമായി പുതുതായി 100 മഞ്ഞക്കോളാമ്പി ചെടിയുടെ തൈകളും യെല്ലോ പാം, സ്റ്റാർ ആപ്പിൾ, റമ്പൂട്ടാൻ തുടങ്ങി പൂച്ചെടികളും ഫലവൃക്ഷങ്ങളും നട്ട് പിടിപ്പിച്ചു.
റോഡിന്റെ ഇരുവശവും പൂച്ചെടികളും ഫലവൃക്ഷങ്ങളും നട്ടുപിടിപ്പിച്ചു മനോഹരം ആക്കുകയാണ് ലക്ഷ്യം. ഇതിന് പ്രധാന തടസ്സം സാമ്പത്തികമാണ്. നിലവിൽ സ്വന്തം ചെലവിലാണ് ഇവർ തൈകൾ വാങ്ങി നടുന്നതും പരിചരണവുമെല്ലാം. നല്ല രീതിയിൽ പൂന്തോട്ടം നിർമ്മിച്ച് കാത്തു പരിപാലിക്കുന്നതിൽ വാഹനങ്ങളിലുള്ള വഴിയോര കച്ചവടക്കാരും അശ്രദ്ധമായ വാഹന പാർക്കിംഗും തടസ്സമാണ്. ചെടികൾ നടുന്നതിന് സഹായകമായി സ്ഥിരം സമിതി അധ്യക്ഷന്റെ ഭാര്യയും മുൻ നഗരസഭാ കൗൺസിലറും ആയ ബിജിമോൾ മാത്യുവും ഒപ്പമുണ്ട്.
