ജയ്പുര് : ഇരുപത്തിയൊന്ന് ദിവസം മുമ്പ് എംഎല്എമാര്ക്ക് നോട്ടീസ് നല്കണം എന്നതടക്കമുള്ള മൂന്ന് നിബന്ധനകളോടെ നിയമസഭ ചേരാന് ഗവര്ണര് അനുമതി നല്കിയതിന് പിന്നാലെ മന്ത്രിസഭായോഗം വിളിച്ച് ചേര്ത്ത് മുഖ്യമന്ത്രി അശോക് ഗെഹ്ലോത്. ഗെഹ്ലോതിന്റെ വസതിയിലാണ് മന്ത്രിസഭായോഗം ചേരുന്നത്.
നിയമസഭ ചേരുന്നതിനെ എതിര്ക്കുന്നില്ലെന്ന് അറിയിച്ച ഗവര്ണര് കല്രാജ് മിശ്ര മുന്ന് നിബന്ധനകളുയര്ത്തി ഗെഹ്ലോതിന്റെ നിര്ദേശം മടക്കി അയച്ചിരുന്നു. വിശ്വാസവോട്ടെടുപ്പ് നടത്താന് നിങ്ങള് ആഗ്രഹിക്കുന്നുണ്ടെങ്കില് 21 ദിവസത്തെ നോട്ടീസ് നല്കേണ്ട ആവശ്യമില്ലെന്നും ഗവര്ണര് വ്യക്തമാക്കിയിരുന്നു. നിയമസഭ വിളിച്ചുചേര്ക്കാന് നിര്ദ്ദേശിച്ചുകൊണ്ട് ഗെഹ്ലോത് സമര്പ്പിച്ച അപേക്ഷയില് ഇക്കാര്യം ഇല്ലെന്നും ഗവര്ണര് ചൂണ്ടിക്കാട്ടി.
വിശ്വാസ വോട്ടെടുപ്പ് അജണ്ടയിലില്ലെങ്കില് കോവിഡ് കണക്കിലെടുത്ത് 21 ദിവസം മുമ്പായി എംഎല്എമാര്ക്ക് നോട്ടീസ് അയക്കണമെന്നാണ് അദ്ദേഹത്തിന്റെ നിലപാട്.
സാമൂഹിക അകലം പാലിച്ച് എങ്ങനെ നിയമസഭ സമ്മേളിക്കുമെന്നാണ് ഗവര്ണറുടെ മറ്റൊരു ചോദ്യം. ഗവര്ണറുടെ പുതിയ നിലപാട് സംബന്ധിച്ച് മന്ത്രിസഭാ യോഗം ചര്ച്ച ചെയ്യും. നിയമസഭ സമ്മേളിക്കാന് മൂന്നാമത്തെ അഭ്യര്ത്ഥന അയുക്കുന്നത് സംബന്ധിച്ചും യോഗം തീരുമാനമെടുക്കുമെന്നാണ് റിപ്പോര്ട്ടുകള്.