റാന്നി: കുടുംബശ്രീ ജെൻഡർ വികസന വിഭാഗത്തിന്റെ ആഭിമുഖ്യത്തിൽ ലിംഗ വിവേചനമില്ലാത്ത ഒരു തലമുറയെ വാർത്തെടുക്കുക എന്ന ലക്ഷ്യത്തോടെ സ്കൂളുകളിൽ നടപ്പാക്കുന്ന പദ്ധതിയായ ജെൻഡർ ക്ലബ് @ സ്കൂൾ പദ്ധതിക്ക് പെരുനാട് ബഥനി ഹൈസ്കൂളിൽ തുടക്കമായി. ലിംഗ ഭേദമില്ലാതെ കുട്ടികളിൽ പഠനം, വിനോദം, സ്പോർട്സ്, കല, സാഹിത്യം തുടങ്ങിയ മേഖലയിൽ തുല്യ അവസരങ്ങളും പങ്കാളിത്തവും ഉറപ്പാക്കുക, സാമൂഹ്യ നീതി ഉറപ്പാക്കുന്ന തരത്തിലുള്ള പഠന പ്രക്രിയ കൊണ്ടുവരിക, അതിക്രമരഹിത സമൂഹം വാർത്തെടുക്കുവാൻ അടിസ്ഥാന വിദ്യാഭ്യാസം നൽകുക എന്നീ ലക്ഷ്യങ്ങളോടെ പ്രവർത്തിക്കുന്നതാണ് ജെൻഡർ ക്ലബ് @ സ്കൂൾ പദ്ധതി.
പെരുനാട് ഗ്രാമപഞ്ചായത്ത് പ്രസിഡന്റ് പി എസ് മോഹനൻ പദ്ധതി ഉദ്ഘാടനം നിർവഹിച്ചു. സ്കൂൾ പ്രധാന അധ്യാപിക ഉഷാകുമാരി അധ്യക്ഷത വഹിച്ചു. കുടുംബശ്രീ ജെൻഡർ പ്രോഗ്രാം മാനേജർ പി.ആര് അനുപ പദ്ധതി വിശദീകരണം നൽകി. പെരുനാട് സി ഡി എസ്സ് അക്കൗണ്ടന്റ് ബിന്ദു, കമ്മ്യൂണിറ്റി കൗൺസിലർ അൽഫിന സിയാദ്, ജെൻഡർ ആർ പി രജനി ബാലൻ എന്നിവർ പ്രസംഗിച്ചു.
