തിരുവനന്തപുരം : സംസ്ഥാനത്തെ പൊതുവിദ്യാഭ്യാസ മേഖലയിൽ കഴിഞ്ഞ ആറ് വർഷത്തിനിടെ 10 ലക്ഷം കുട്ടികളുടെ വർദ്ധനവുണ്ടായതായി മുഖ്യമന്ത്രി പിണറായി വിജയൻ. മുൻകാലങ്ങളിൽ പൊതുവിദ്യാലയങ്ങൾ ദാരിദ്ര്യത്തിന്റെ പര്യായമായിരുന്നു. മാതാപിതാക്കൾ അവരുടെ കുട്ടികളെ അവിടേക്ക് അയയ്ക്കാൻ വിമുഖത കാണിച്ചിരുന്നു. 2016 ലെ പ്രകടനപത്രികയിൽ പൊതുവിദ്യാലയങ്ങൾ മെച്ചപ്പെടുത്തുമെന്ന് വാഗ്ദാനം ചെയ്തിരുന്നു. ചിലരെങ്കിലും അന്ന് അതൊരു വാഗ്ദാനം മാത്രമായിരിക്കുമെന്ന് തെറ്റിദ്ധരിച്ചു. എന്നാൽ ഒരു കാര്യം പറയുകയും മറ്റൊന്ന് ചെയ്യുകയും ചെയ്യുന്ന മുന്നണിയല്ല എൽ.ഡി.എഫ്. എന്ത് പറഞ്ഞാലും നടപ്പാക്കുമെന്നും മുഖ്യമന്ത്രി പറഞ്ഞു. സംസ്ഥാനത്തുടനീളം 75 സ്കൂൾ കെട്ടിടങ്ങളുടെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.
സംസ്ഥാനത്ത് വികസനം നടപ്പാക്കുന്നതിൽ പക്ഷപാതപരമായ മനോഭാവമില്ലെന്ന് മുഖ്യമന്ത്രി പിണറായി വിജയൻ. സ്കൂളുമായി ബന്ധപ്പെട്ട വിഷയങ്ങളിൽ ഇടപെടുമ്പോൾ പക്ഷപാതമില്ലെന്ന് മുഖ്യമന്ത്രി ആവർത്തിച്ചു. സ്കൂൾ അടിസ്ഥാന സൗകര്യവികസനം, പുതിയ കെട്ടിട നിർമാണം, അക്കാദമിക മികവ് വർധിപ്പിക്കുന്നതിനുള്ള നടപടികൾ തുടങ്ങിയവ യാതൊരു വ്യത്യാസവുമില്ലാതെ ഓരോ ജില്ലയിലും നടപ്പാക്കി വരികയാണ്. എല്ലാ മേഖലയിലും കക്ഷിരാഷ്ട്രീയത്തിൽ വ്യത്യാസമില്ലാത്ത വികസനമാണ് സർക്കാരിന്റെ പൊതുനയം. ഇവിടെ പൊതുവിദ്യാലയങ്ങളെ ശാക്തീകരിക്കുമ്പോൾ, ഗുണഭോക്താക്കളിൽ ഭൂരിഭാഗവും നമ്മുടെ രാജ്യത്തെ ദരിദ്രരാണ്. സാധാരണക്കാരന്റെ മക്കൾക്ക് മെച്ചപ്പെട്ട ആധുനിക വിദ്യാഭ്യാസവും നൽകും.
എൽ.ഡി.എഫ് സർക്കാർ അധികാരത്തിൽ വന്ന് ആറ് വർഷം പിന്നിടുമ്പോൾ നിർജ്ജീവമായി കിടന്നിരുന്ന സംസ്ഥാനത്തെ പല സ്കൂളുകളും ഇപ്പോൾ കണ്ണഞ്ചിപ്പിക്കുന്ന കെട്ടിടങ്ങളായി രൂപാന്തരപ്പെട്ടിരിക്കുന്നു. കൊവിഡ് കാലത്തും കുട്ടികൾക്ക് മെച്ചപ്പെട്ട വിദ്യാഭ്യാസവും ഡിജിറ്റൽ വിദ്യാഭ്യാസവും ഉറപ്പാക്കി കേരളം ലോകോത്തര ശ്രദ്ധ നേടി.
