ഡൽഹി : കേരളത്തില്‍ ഇത്തവണയും പ്രളയത്തിന് സാധ്യതയുണ്ടെന്ന് ഭൗമശാസ്ത്ര മന്ത്രാലയം. ഇക്കാര്യത്തിൽ സർക്കാർ ആവശ്യമായ മുന്നൊരുക്കങ്ങൾ നടത്തണമെന്ന് മന്ത്രാലയ സെക്രട്ടറി ഡോ. എം. രാജീവൻ പറഞ്ഞു. കഴിഞ്ഞ 10 വർഷത്തെ കണക്ക് നോക്കുമ്പോൾ പ്രളയത്തിനുള്ള സാധ്യത വർധിച്ചു വരികയാണ്. ഇത്തവണയും അത് പ്രതീക്ഷിക്കണം. സർക്കാർ ആവശ്യമായ തയ്യാറെടുപ്പുകൾ നടത്തണം. ഈ വർഷം മാത്രമല്ല വരും വർഷങ്ങളിലും പ്രളയത്തിന് സാധ്യതയുണ്ട്. എപ്പോൾ മഴപെയ്യും എന്ന കാര്യം മഴയ്ക്ക് രണ്ട് മൂന്ന് ദിവസത്തിനു മുൻപായി അറിയിക്കുമെന്നും ഡോ. എം. രാജീവൻ പറഞ്ഞു. കഴിഞ്ഞ വർഷത്തേതിന് സമാനമായ മഴ ഇത്തവണയും ലഭിക്കാൻ സാധ്യതയുണ്ട്. ജൂൺ മുതൽ സെപ്തംബർ വരെയുള്ള കാലത്ത് ഉയർന്ന തോതിൽ മഴ ലഭിക്കും. ആളുകളെ ഒഴിപ്പിക്കലും ഡാമുകൾ തുറക്കുകയും ചെയ്യുന്ന കാര്യത്തിൽ സർക്കാരുകൾക്ക് ശ്രദ്ധവേണം. ഇക്കാര്യത്തിൽ ജനങ്ങൾക്ക് ആവശ്യമായ മുന്നറിയിപ്പുകൾ നൽകണമെന്നും അദ്ദേഹം വ്യക്തമാക്കി.
