ദില്ലി: കോണ്ഗ്രസിനെതിരെ വിമര്ശനവുമായി ഗുലാം നബി ആസാദ്. ബിജെപിയുടെ ഇന്നത്തെ വളര്ച്ചക്ക് കാരണം ഇപ്പോഴത്തെ കോണ്ഗ്രസ് നേതൃത്വമാണെന്ന് ഗുലാം നബി ആസാദ് പറഞ്ഞു. ബിജെപിയുടെ നയങ്ങള് ഒരിക്കലും മുസ്ലിങ്ങളെയോ ന്യൂനപക്ഷങ്ങളെയോ സഹായിക്കുന്നവയല്ല. പക്ഷേ സഹായിക്കുകയാണ് എന്ന പ്രതീതി അവര് ഉണ്ടാക്കുന്നുണ്ടെന്നും ഗുലാം നബി ആസാദ് തുറന്നടിച്ചു. ഇന്ദിര ഗാന്ധിയെ അറസ്റ്റ് ചെയ്തപ്പോള് ലക്ഷക്കണക്കിനാളുകള് രാജ്യത്തുടനീളം ജയിലില് പോയി. എന്നാല് രാഹുല് ഗാന്ധിയെ അയോഗ്യനാക്കിയപ്പോള് ഒരു കൊതുക് പോലും കരഞ്ഞില്ലെന്നും അദ്ദേഹം പറഞ്ഞു.
ബിജെപിയുടെ നയങ്ങളോട് വിയോജിക്കുമ്പോഴും പ്രധാനമന്ത്രി നരേന്ദ്ര മോദിയില് ചില നല്ല ഗുണങ്ങളുണ്ട്. മോദിക്കെതിരെ ഏഴ് വര്ഷം പ്രതിപക്ഷ നേതാവായിരുന്നപ്പോള് ഞാന് അദ്ദേഹത്തിന്റെ ചായസത്കാര ക്ഷണങ്ങള് നിരസിച്ചിരുന്നു. പക്ഷേ അതിന്റെ വിരോധം അദ്ദേഹം കാണിച്ചിട്ടില്ല, നരേന്ദ്ര മോദിയുടെ നയങ്ങളോട് യോജിക്കാനാവില്ലന്നും പക്ഷേ പ്രധാനമന്ത്രി കാട്ടിയ മര്യാദ പ്രശംസനീയമാണെന്നും ഗുലാം നബി ആസാദ് പറഞ്ഞു.
