ചെന്നൈ: പ്രധാനമന്ത്രി നരേന്ദ്ര മോദിയുടെ സന്ദര്ശനത്തിനെതിരെ തമിഴ്നാട്ടിലും പ്രതിഷേധം. കോണ്ഗ്രസിന്റേയും വിവിധ ദ്രാവിഡ സംഘടനകളുടെയും ആഭിമുഖ്യത്തിലാണ് പ്രതിഷേധം. ഗോ ബാക്ക് മോദി ഹാഷ്ടാഗില് സാമൂഹ മാധ്യമങ്ങളിലും പ്രതിഷേധം കനക്കുന്നുണ്ട്. രാഹുല് ഗാന്ധിയെ അയോഗ്യനാക്കിയതിനെതിരെയാണ് കോണ്ഗ്രസിന്റെ പ്രതിഷേധം. വള്ളുവര് കോട്ടത്ത് കോണ്ഗ്രസ് പ്രവര്ത്തകര് കറുത്ത വസ്ത്രം ധരിച്ച് കരിങ്കൊടി കാണിച്ച് പ്രതിഷേധിച്ചു. ‘ഗോ ബാക്ക് മോദി’ തുടങ്ങിയ മുദ്രാവാക്യങ്ങളും അവര് വിളിച്ചു. മോദിയെ തമിഴ്നാട്ടില് കാലുകുത്താന് അനുവദിക്കരുതെന്നാണ് പ്രതിഷേധക്കാരുടെ ആവശ്യം.
പ്രതിഷേധ സൂചകമായി ആദ്യം കറുത്ത ബലൂണുകള് ആകാശത്തേക്ക് വിടാനാണ് കോണ്ഗ്രസ് പ്രവര്ത്തകര് ശ്രമിച്ചത്. എന്നാല്, കറുത്ത ബലൂണുകള് പറത്താന് അനുമതി നിഷേധിച്ചു. തുടര്ന്ന് വള്ളുവര് കോട്ടത്ത് പ്രതിഷേധ പ്രകടനം നടത്താന് പോലീസ് അനുമതി നല്കി. അതേസമയം, പ്രധാനമന്ത്രി നരേന്ദ്രമോദിയെ സ്വീകരിക്കാന് പോലീസ് സുരക്ഷ ശക്തമാക്കിയിട്ടുണ്ട്. ഉച്ചയ്ക്ക് 2.30ന് മോദി വിവിധ പരിപാടികള്ക്കായി ചെന്നൈയിലെത്തും. ചെന്നൈ വിമാനത്താവളത്തിലെ നവീകരിച്ച ടെര്മിനല് മോദി ഉദ്ഘാടനം ചെയ്യും. 1260 കോടി രൂപ ചെലവിലാണ് ടെര്മിനലിന്റെ ആദ്യഘട്ട നവീകരണം പൂര്ത്തിയാക്കിയത്.
