മുംബൈ : രാജ്യത്ത് സ്വര്ണ്ണവിലയില് വര്ധനവ്. പവന് 256 രൂപ ഉയര്ന്ന് 35,424 രൂപയാണ് ഇന്നത്തെ വില. ഗ്രാമിന് 4,428 രൂപയും. രാജ്യാന്തര വിപണിയിലെ ചാഞ്ചാട്ടങ്ങളാണ് ആഭ്യന്തര വിപണിയിലും പ്രതിഫലിക്കുന്നത്. വിവിധ സംസ്ഥാനങ്ങളിലും ഇതിനനുസരിച്ച് സ്വര്ണ്ണവിലയില് ഏറ്റക്കുറച്ചിലുകള് ഉണ്ടാകും.
ഈ വര്ഷത്തെ കേന്ദ്ര ബജറ്റിനു ശേഷമുള്ള ദിവസങ്ങളില് സ്വര്ണ വില ചാഞ്ചാട്ടത്തിലാണ്. ഫെബ്രുവരി 19ന് ഈ മാസത്തെ കുറഞ്ഞ നിരക്കായ 34,400ല് എത്തിയ വില പിന്നീട് ഉയര്ന്നിരുന്നു. കേന്ദ്ര ബജറ്റില് ഇറക്കുമതി തീരൂവ കുറച്ചതിനു പിന്നാലെ ഏതാനും ദിവസങ്ങളില് വില ഇടിവു പ്രകടിപ്പിച്ചെങ്കിലും ട്രെന്ഡ് നിലനിന്നില്ല. തിരിച്ചുകയറിയ വില പിന്നീട് ഏറിയും കുറഞ്ഞും നില്ക്കുകയാണ്. ഫെബ്രുവരി ഒന്നിന് സ്വര്ണത്തിന്റെ ഇറക്കുമതി തീരുവ കുറയ്ക്കുമെന്ന ബജറ്റ് പ്രഖ്യാപനത്തിന് ശേഷം പവന് 1800 രൂപ കുറഞ്ഞിരുന്നു. പിന്നീട് മൂന്ന് തവണയായി 800 രൂപ വര്ധിക്കുകയും ചെയ്തു. കേന്ദ്ര ബജറ്റിന് പിന്നാലെ തുടര്ച്ചയായി ഇടിവ് രേഖപ്പെടുത്തിയ സ്വര്ണവില രണ്ടാഴ്ച മുമ്പ് മുതല് വര്ദ്ധിക്കാന് തുടങ്ങിയിരുന്നു. തുടര്ന്നുള്ള ദിവസങ്ങളിലും സ്വര്ണ വില കൂടി. പിന്നീടാണ് വില കുറഞ്ഞത്.
ബജറ്റില് ഇറക്കുമതി തീരുവ കുറച്ചതിനു ശേഷം തുടര്ച്ചയായി സ്വര്ണവിലയില് കുത്തനെ ഇടിവാണ് ഉണ്ടായത്. 5 ദിവസം കൊണ്ട് 1600രൂപയാണ് പവന് കുറഞ്ഞത്. ധനമന്ത്രി നിര്മല സീതാരാമന് അവതരിപ്പിച്ച കേന്ദ്ര ബജറ്റില് സ്വര്ണത്തിന്റെ ഇറക്കുമതി തീരുവ 12.5 ശതമാനത്തില് നിന്ന് 10 ശതമാനമായി കുറച്ചിരുന്നു. ഇറക്കുമതി തീരുവ കുറച്ചതിലൂടെ സ്വര്ണക്കടത്തിന് തടയാന് കഴിയുമെന്നാണ് വിലയിരുത്തല്. സ്വര്ണക്കടത്ത് കൂടുന്നുവെന്ന റിപ്പോര്ട്ടുകളുടെ അടിസ്ഥാനത്തിലാണ് തീരുവ കുറയ്ക്കാന് ബജറ്റില് തീരുമാനമുണ്ടായത്. സ്വര്ണത്തിനൊപ്പം വെള്ളിയുടെയും ഇറക്കുമതി തീരുവ കുറച്ചിരുന്നു.
വില കൂടിയാലും കുറഞ്ഞാലും സ്വര്ണത്തെ സുരക്ഷിത നിക്ഷേപമായാണ് ജനങ്ങള് എന്നും കാണുന്നത്. നിക്ഷേപ മൂല്യം എന്നതിലുപരി സ്വര്ണത്തെ ആഭരണങ്ങളായും നാണയങ്ങളായും കൈവശം വെയ്ക്കാന് ആളുകള് താത്പര്യപ്പെടുന്നു. സ്വര്ണത്തിന്റെ രാജ്യാന്തര വില, ഡോളര് – രൂപ വിനിമയ നിരക്ക്, ഇറക്കുമതി തീരുവ എന്നിവ അടിസ്ഥാനമാക്കിയാണ് സംസ്ഥാനത്ത് സ്വര്ണ വില നിര്ണയിക്കപ്പെടുന്നത്.
