തിരുവനന്തപുരം : നയതന്ത്ര സ്വര്ണക്കടത്ത് കേസില് തനിക്കെതിരെ ബിജെപി നേതാവ് ഗോപാലകൃഷ്ണന് ഉന്നയിച്ച ആരോപണങ്ങള്ക്ക് മറുപടിയുമായി കെ.സി. വേണുഗോപാല് എം.പി. ആരോപണം തെറ്റിദ്ധാരണാജനകമാണെന്നും യഥാര്ഥ കേസില് നിന്നും ശ്രദ്ധതിരിക്കാനാണ് ഗോപാലകൃഷ്ണന്റെ ശ്രമമെന്നും സ്വപ്നയുടെ നിയമനത്തില് തന്റെ പങ്ക് തെളിയിക്കാന് വെല്ലുവിളിക്കുന്നുവെന്നും വേണുഗോപാല് പറഞ്ഞു.
സ്വപ്നയുടെ കേരളത്തിലെ ആദ്യ സ്പോണ്സര് വേണുഗോപാല് ആണെന്നും സ്വപ്നയെ ഒളിപ്പിച്ചിരിക്കുന്നത് വേണുഗോപാലാണോയെന്ന് സംശയിക്കുന്നുവെന്നുമാണ് ഗോപാലകൃഷ്ണന് ആരോപിച്ചത്. സ്വര്ണക്കടത്ത് വിഷയത്തില് കോണ്ഗ്രസിന് ആത്മാര്ത്ഥതയില്ല. സ്വപ്നയ്ക്ക് എയര് ഇന്ത്യ സാറ്റ്സില് ജോലി ലഭിച്ചത് വേണുഗോപാല് കേന്ദ്ര സിവില് ഏവിയേഷന് സഹമന്ത്രിയായിരിക്കെയായിരുന്നു.
വേണുഗോപാലിന്റെ നേരിട്ടുള്ള ഇടപെടല് ഇതില് ഉണ്ടായിരുന്നു. ഇക്കാര്യത്തില് തെളിവ് ഹാജരാക്കാന് തയാറാണ്. കോണ്സുലേറ്റില് സ്വപ്നയെ ശിപാര്ശ ചെയ്ത കോണ്ഗ്രസ് നേതാവ് ആരാണെന്ന് അന്വേഷിക്കണം. കെ.സി. വേണുഗോപാല് മന്ത്രിയായിരുന്ന 2012- 2014 കാലഘട്ടത്തില് നടന്ന ഇടപെടലുകളെക്കുറിച്ച് അന്വേഷിക്കണമെന്നും ഗോപാലകൃഷ്ണന് പറഞ്ഞിരുന്നു.
