ഡല്ഹി: ബോര്ഡര് റോഡ് ഓര്ഗനൈസേഷന് ജമ്മു കശ്മീരില് നിര്മ്മിച്ച ആറ് പാലങ്ങള് രാജ്യരക്ഷാ മന്ത്രി രാജ്നാഥ് സിംഗ് ഇന്ന് ഉദ്ഘാടനം ചെയ്യും. 43 കോടി രൂപ മുതല് മുടക്കിലാണ് പാലങ്ങള് നിര്മ്മിച്ചിരിക്കുന്നത്. നാല് പാലങ്ങള് അഖ്നൂര് മേഖലയിലും രണ്ടെണ്ണം ജമ്മു -രാജ്പുര മേഖലയിലുമാണ് നിര്മ്മിച്ചിരിക്കുന്നതെന്ന് പ്രതിരോധ മന്ത്രാലയ വക്താവ് അറിയിച്ചു.
കശ്മീരിന്റെ സമഗ്രമായ വികസനത്തിനും അടിയന്തര ഘട്ടത്തിലെ സേനയുടെ അനായസമായ വിന്യാസത്തിനുമായി മേഖലയിലെ ചെറുതും വലുതുമായ മുഴുവന് പാതകളും നവീകരിക്കാനും പുതിയ ഹൈവേ അടക്കമുള്ളവ നിര്മ്മിക്കാനുമാണ് കേന്ദ്രസര്ക്കാരിന്റെ തീരുമാനം. ഇതിന്റെ ഭാഗമായി കഴിഞ്ഞ മാസം 1,691 കോടി രൂപയുടെ പദ്ധതിക്ക് കേന്ദ്രം അനുമതി നല്കിയിരുന്നു. ഉത്തരാഖണ്ഡിലെയും ജമ്മു കശ്മീരിലെയും തന്ത്രപ്രധാന മേഖലകളിലെ പാതകളുടെ നിര്മ്മാണം ബോര്ഡര് റോഡ് ഓര്ഗനൈസേഷനെയാണ് ഏല്പ്പിച്ചിരിക്കുന്നത്.
