നെടുമ്പാശേരി: രണ്ടര കോടിയിലേറെ രൂപയുടെ സ്വര്ണം കടത്താന് ശ്രമിച്ച രണ്ട് അഭ്യന്തര യാത്രക്കാരെ കൊച്ചി രാജ്യാന്തരവിമാന താവളത്തില് കസ്റ്റംസ് പിടികൂടി. വ്യാജ പേരില് ടിക്കറ്റെടുത്ത് വന്നിറങ്ങിയ ഇവരെ കര്ശനമായ നിരീക്ഷണത്തെത്തുടര്ന്നാണ് അതിവിദഗ്ധമായി പിടികൂടുവാന് കഴിഞ്ഞത്.
തമിഴ്നാട് രാമനാഥപുരം സ്വദേശികളായ സെയ്ദ് അബു താഹിര് , ഭരകത്തുള്ള എന്നിവരെയാണ് പിടികൂടിയത്. അഭ്യന്തര വിമാനത്തിലെത്തുന്ന യാത്രക്കാരെ സാധാരണയായി കസ്റ്റംസ് പരിശോധിക്കാറില്ല. എന്നാല് കഴിഞ്ഞ ദിവസം രാജ്യാന്തര സര്വീസിനുശേഷം അഭ്യന്തര സര്വീസിനൊരുങ്ങിയ വിമാനത്തില് നിന്നും സ്വര്ണം പിടികൂടിയിരുന്നു.
മാത്രമല്ല അഭ്യന്തര യാത്രക്കാര് സ്വര്ണവുമായി എത്തുമെന്ന് രഹസ്യ വിവരവും കസ്റ്റംസിന് ലഭിച്ചിരുന്നു. ഇതിന്റെ പശ്ചാത്തലത്തില് നിരീക്ഷണം ശക്തമാക്കിയതിനാലാണ് ഇവരെ പിടികൂടാന് കഴിഞ്ഞത്. മുംബൈയില് നിന്ന് ഇന്ഡിഗോ വിമാനത്തില് വാസുദേവന്, അരുള് ശെല്വം എന്നീ പേരുകളിലാണ് ഇവരെത്തിയത്. ഇരുവരുടേയും ഹാന്ഡ് ബാഗുകളിലായി പത്ത് കാപ്സ്യൂളുകളുടെ രൂപത്തിലാക്കിയാണ് 6454 ഗ്രാം സ്വര്ണം അതിവിദഗ്ധമായി ഒളിപ്പിച്ചത്. പ്രാഥമിക ചോദ്യം ചെയ്യലില് മുംബൈ വിമാന താവളത്തിലെ സെക്യൂരിറ്റി ഹാളില് വച്ച് ഒരു ശ്രീലങ്കന് വംശജനാണ് ഹാന്ഡ്ബാഗേജുകള് കൈമാറിയതെന്ന് ഇവര് മൊഴി നല്കി.
ഗള്ഫില് നിന്നുമെത്തിച്ച സ്വര്ണം കസ്റ്റംസ് പരിശോധന കൂടാതെ പുറത്തുകടത്താന് മുംബൈ വിമാന താവളത്തിലെ ചിലരുടെ സഹായത്തോടെ ഇവര് അഭ്യന്തര യാത്രക്കാരായെത്തി ശ്രമിച്ചതാണെന്നാണ് കസ്റ്റംസിന്റെ നിഗമനം. ആരാണ് ഗള്ഫില് നിന്നും സ്വര്ണം കൊണ്ടുവന്നതും തുടര്ന്ന് ഇവര്ക്ക് കൈമാറിയതും ആരൊക്കെയാണെന്നത്സംബന്ധിച്ച് വിശദമായ അന്വേഷണം നടത്തുമെന്ന് കസ്റ്റംസ് അറിയിച്ചു. ജാമ്യമില്ലാ വകുപ്പ് പ്രകാരമാണ് ഇരുവര്ക്കെതിരെയും കേസെടുത്തിട്ടുള്ളത്. വിശദമായ ചോദ്യം ചെയ്തുവരികയാണ്.