തിരുവനന്തപുരം: സ്വര്ണകടത്ത് കേസില് മാധ്യമ പ്രവര്ത്തകനായ അനില് നമ്പ്യാരെ ഇന്ന് ചോദ്യം ചെയ്യും. കൊച്ചിയിലെ കസ്റ്റംസ് ഓഫീസില് ഇന്ന് രാവിലെ പതിനൊന്നു മണിക്ക് എത്താനാണ് അദ്ദേഹത്തോട് ആവശ്യപ്പെട്ടിരിക്കുന്നത്. കേസിലെ പ്രതി സ്വപ്ന സുരേഷുമായി സ്വര്ണം വന്ന ദിവസങ്ങളില് നിരന്തരമായി ഫോണ് വിളിച്ചതിന്റെ പശ്ചാത്തലത്തിലാണ് ചോദ്യം ചെയ്യാന് വിളിപ്പിച്ചിരിക്കുന്നത്. കസ്റ്റംസ് പിടിച്ച സ്വര്ണമടങ്ങിയ ബാഗ് പുറത്തിറക്കാന് സഹായം നല്കിയോയെന്ന് അന്വേഷിക്കാനാണ് ചോദ്യം ചെയ്യല്.
ജൂലൈ അഞ്ചിനാണ് നയതന്ത്ര ബാഗേജ് വഴിയുള്ള സ്വര്ണക്കടത്ത് കസ്റ്റംസ് പിടികൂടുന്നത്. അതേദിവസം ഉച്ചയ്ക്കാണ് സ്വപ്നാ സുരേഷും അനില് നമ്പ്യാരും ഫോണില് നിരവധി തവണ ബന്ധപ്പെട്ടതായി പറയുന്നത്. സ്വപ്നയും അനില് നമ്പ്യാരും പല തവണ നേരില് കണ്ട് സംസാരിച്ചിട്ടുണ്ടെന്നും കസ്റ്റംസ് കണ്ടെത്തി. താന് സ്വപ്നയെ വിളിച്ചത് കോണ്സുല് ജനറലിന്റെ എക്സിക്യൂട്ടീവ് സെക്രട്ടറിയാണെന്ന ധാരണയിലാണെന്നാണ് ഇതിന് അനില് നമ്പ്യാര് നല്കിയ വിശദീകരണം. യു.എ.ഇ കോണ്സുല് ജനറലിന്റെ എക്സിക്യൂട്ടീവ് സെക്രട്ടറി സ്ഥാനത്ത് നിന്നും സ്വപ്ന സുരേഷ് സര്ക്കാര് വകുപ്പിലേക്ക് മാറിയ കാര്യം തനിക്കറിയില്ലായിരുന്നെന്നുമാണ് അനില് നമ്പ്യാര് പറയുന്നത്.