ചങ്ങനാശേരി : പച്ചക്കറി കയറ്റിവന്ന പിക്കപ്പ് വാന്‍ നിയന്ത്രണംവിട്ട് കടയിലേക്ക് ഇടിച്ചുകയറി അപകടം. പിക്കപ്പ് വാന്‍ ഡ്രൈവറടക്കം രണ്ടുപേര്‍ക്കു പരിക്കേറ്റു. ഡ്രൈവര്‍ ആദര്‍ശ് (35), സഹായി അമല്‍ (23) എന്നിവര്‍ക്കാണ് പരിക്കേറ്റത്. ശനിയാഴ്ച രാവിലെ 6.30-ന് പോസ്റ്റ് ഓഫീസ് ജംഗ്ഷനിലാണ് അപകടം നടന്നത്. വയനാട്ടില്‍ നിന്ന് ഏത്തക്കുല കയറ്റി വന്ന വാഹനമാണ് അപകടത്തില്‍പ്പെട്ടത്.
സംഭവം നടന്നത് ഫയര്‍ സ്റ്റേഷന്‍ ഓഫീസിന് തൊട്ടടുത്തായതിനാല്‍ സ്റ്റേഷന്‍ അസിസ്റ്റന്റ് ഓഫീസര്‍ ദിലീപിന്റെ നേതൃത്വത്തിലുള്ള സംഘം എത്തി പിക്കപ്പ് വാനിന്റെ കാബിന്‍ വെട്ടിപ്പൊളിച്ചാണ് അകത്ത് കുടുങ്ങിയവരെ രക്ഷപ്പെടുത്തിയത്. ഫയര്‍ ഫോഴ്സ് സംഘം ഇവരെ ജനറല്‍ ആശുപത്രിയില്‍ പ്രവേശിപ്പിച്ചു. തുടര്‍ന്ന്, ഇവരെ കോട്ടയം മെഡിക്കല്‍ കോളജ് ആശുപത്രിയിലേക്ക് മാറ്റി.
