ക്വാറികളുടെ പ്രവര്ത്തനവും മണ്ണെടുപ്പും നിരോധിച്ച് ഉത്തരവ്
ജില്ലയില് ശക്തമായ മഴ തുടരുന്ന സാഹചര്യത്തില് മണ്ണിടിച്ചില്, ഉരുള്പൊട്ടല് തുടങ്ങിയ ദുരന്ത സാധ്യതകള് ഒഴിവാക്കുന്നതിനായി സെപ്റ്റംബര് ആറിന് പത്തനംതിട്ട ജില്ലയിലെ എല്ലാ ക്വാറികളുടെയും പ്രവര്ത്തനവും മലയോരത്തു നിന്നും മണ്ണ് വെട്ടിമാറ്റുക, ആഴത്തിലുള്ള കുഴികള് നിര്മിക്കുക, നിര്മാണത്തിനായി ആഴത്തില് മണ്ണ് മാറ്റുക എന്നീ പ്രവര്ത്തനങ്ങളും നിരോധിച്ച് ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ. ദിവ്യ എസ് അയ്യര് ഉത്തരവായി. നിര്ദേശങ്ങള് ലംഘിക്കുന്നവര്ക്കെതിരേ ദുരന്തനിവാരണ നിയമം 2005 പ്രകാരം കര്ശന നടപടികള് സ്വീകരിക്കും.
ഉരുള്പൊട്ടല്, മണ്ണിടിച്ചില് സാധ്യതയുള്ള സ്ഥലങ്ങളിലുള്ളവരെ മാറ്റിപാര്പ്പിക്കും
ജില്ലയിലെ ഉരുള്പൊട്ടല്, മണ്ണിടിച്ചില് സാധ്യതയുണ്ടെന്ന് കണ്ടെത്തിയിട്ടുള്ള സ്ഥലങ്ങളില് താമസിക്കുന്നവരെ ദുരിതാശ്വാസ ക്യാമ്പുകളിലേക്ക് മാറ്റി പാര്പ്പിക്കുന്നതിന് ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ. ദിവ്യ എസ് അയ്യര് ഉത്തരവായി. സീതത്തോട്, അരുവാപ്പുലം, ചിറ്റാര്, തണ്ണിത്തോട്, പെരുനാട്, കൊല്ലമുള, നാരങ്ങാനം, ഏറത്ത്, ഏനാദിമംഗലം, കോന്നി, പത്തനംതിട്ട തുടങ്ങിയ വില്ലേജുകളുടെ പരിധിയിലുള്ള അപകട സാധ്യതയുള്ള സ്ഥലങ്ങളില് താമസിക്കുന്നവരെയാണ് സുരക്ഷിതസ്ഥാനത്തേക്ക് മാറ്റുക.
ഇതിനു പുറമേ പ്രാദേശികമായി അപകടസാധ്യതയുണ്ടെന്ന് വിലയിരുത്തുന്ന പ്രദേശങ്ങളില് പാര്ക്കുന്നവരെയും മാറ്റിതാമസിപ്പിക്കും. ജില്ലാപോലീസ് മേധാവി, ഡിവിഷണല് ഫോസ്റ്റ് ഓഫീസര്മാര്, റവന്യു ഡിവിഷണല് ഓഫീസര്മാര്, ജില്ലാ ഫയര് ഓഫീസര്, ജില്ലാ ജിയോളജിസ്റ്റ്, ജില്ലാ മണ്ണുസംരക്ഷണ ഓഫീസര്, റീജിയണല് ട്രാന്സ്പോര്ട്ട് ഓഫീസര്, ജില്ലാ മൃഗസംരക്ഷണ ഓഫീസര്, തഹസീല്ദാര്മാര്, പ്രാദേശിക സര്ക്കാരുകള് എന്നിവരെ ഇതിനായി ഉത്തരവില് ചുമതലപ്പെടുത്തിയിട്ടുണ്ട്.
