ജില്ല വികസന സമിതി യോഗം സെപ്റ്റംബര് 26 ന്
ജില്ല വികസന സമിതി യോഗം സെപ്റ്റംബര് 26 രാവിലെ 10.30 ന് ജില്ല ആസൂത്രണ സമിതി സെക്രട്ടേറിയറ്റ് കോണ്ഫറന്സ് ഹാളില് ചേരും.
–
പേവിഷബാധ പ്രതിരോധം : സ്കൂള് വിദ്യാര്ഥികള്ക്കായി പ്രസംഗ മത്സരം
ലോക പേവിഷബാധ ദിനാചരണത്തിന്റെ ഭാഗമായി ജില്ല മെഡിക്കല് ഓഫീസ്, ആരോഗ്യ കേരളം പത്തനംതിട്ട എന്നിവയുടെ സംയുക്താഭിമുഖ്യത്തില് ജില്ലയിലെ ഹൈസ്കൂള്, ഹയര് സെക്കന്ഡറി വിദ്യാര്ഥികള്ക്ക് ഒക്ടോബര് മൂന്ന് രാവിലെ 10.30 ന് കളക്ടറേറ്റ് പമ്പ കോണ്ഫറന്സ് ഹാളില് പ്രസംഗമത്സരം സംഘടിപ്പിക്കുന്നു. മലയാളത്തിലാണ് മത്സരം. വിഷയം: ”പേവിഷബാധയില്ലാത്ത സമൂഹം നമ്മുടെ സ്വപ്നം, നമ്മുടെ ഉത്തരവാദിത്തം”. വിജയികള്ക്ക് ക്യാഷ്പ്രൈസും സര്ട്ടിഫിക്കറ്റും നല്കും. മത്സരത്തില് പങ്കെടുക്കാന് സെപ്റ്റംബര് 30 ന് മുമ്പ് രജിസ്റ്റര് ചെയ്യണം. ഫോണ് 9496109189, 9633975603.
അനധികൃത ബോര്ഡുകള് നീക്കം ചെയ്യണം
ഓമല്ലൂര് ഗ്രാമപഞ്ചായത്തിലെ പൊതുസ്ഥലങ്ങള്, പാതയോരങ്ങള്, ഫുട്പാത്തുകള്, ഹാന്ഡ് റെയിലുകള്, സെന്റര് മീഡിയനുകള്, ട്രാഫിക് ഐലന്റുകള് എന്നിവടങ്ങളില് സ്ഥാപിച്ച അനധികൃത കൊടിമരങ്ങള്, ബാനറുകള്, ഫ്ളക്സ് ബോര്ഡുകള്, കൊടി തോരണങ്ങള് എന്നിവ 24 മണിക്കൂറിനകം നീക്കം ചെയ്യണം. അല്ലെങ്കില് അവ നീക്കം ചെയ്ത് ഉത്തരവാദികളില് നിന്ന് ബോര്ഡുകളുടെ എണ്ണത്തിന് ആനുപാതികമായി പിഴ ഈടാക്കി നിയമനടപടി സ്വീകരിക്കുമെന്ന് ഗ്രാമപഞ്ചായത്ത് സെക്രട്ടറി അറിയിച്ചു. ഫോണ് 04682 350237.
–
വാഹനം ആവശ്യമുണ്ട്
സാമൂഹികനീതി വകുപ്പിന് കീഴിലുള്ള ജില്ല പ്രൊബേഷന് ഓഫീസ് ആവശ്യങ്ങള്ക്ക് 2026-27 സാമ്പത്തിക വര്ഷം കരാര് അടിസ്ഥാനത്തില് ടാക്സി പെര്മിറ്റുള്ള ജീപ്പ്/കാര് നല്കുന്നതിന് ടെന്ഡര് ക്ഷണിച്ചു. വാഹനം 12 വര്ഷത്തില് താഴെ കാലപ്പഴക്കം ഉള്ളതായിരിക്കണം. ടെന്ഡര് സ്വീകരിക്കുന്ന അവസാന തീയതി ഒക്ടോബര് 12 ഉച്ചയ്ക്ക് രണ്ട്. വിവരങ്ങള്ക്ക് പത്തനംതിട്ട കാപ്പില് ആര്ക്കേഡ് ബില്ഡിംഗ്, ഡോക്ടേഴ്സ് ലൈന് ഒന്നാം നിലയില് പ്രവര്ത്തിക്കുന്ന ജില്ല പ്രൊബേഷന് ഓഫീസുമായി ബന്ധപ്പെടണം. ഫോണ് 04682 325242.
പഠനമുറി പദ്ധതിയിലേക്ക് പട്ടികജാതി വിദ്യാര്ഥികള്ക്ക് അപേക്ഷിക്കാം
പത്തനംതിട്ട നഗരസഭ പരിധിയില് താമസിക്കുന്ന പട്ടികജാതി വിഭാഗത്തിലെ വിദ്യാര്ഥികള്ക്ക് പട്ടികജാതി വികസന വകുപ്പ് നടപ്പാക്കുന്ന പഠനമുറി പദ്ധതിയിലേക്ക് അപേക്ഷ ക്ഷണിച്ചു. സംസ്ഥാനത്തെ സര്ക്കാര്, എയ്ഡഡ്, ടെക്നിക്കല്, സ്പെഷ്യല്, കേന്ദ്രീയ വിദ്യാലയ സ്കൂളുകളില് അഞ്ചു മുതല് 12 വരെ ക്ലാസുകളില് പഠിക്കുന്നവര്ക്ക് അപേക്ഷിക്കാം. ജാതി സര്ട്ടിഫിക്കറ്റ്, വരുമാന സര്ട്ടിഫിക്കറ്റ്, വിദ്യാര്ഥി പഠിക്കുന്ന സ്ഥാപനമേധാവിയുടെ സാക്ഷ്യപത്രം, നഗരസഭ/പഞ്ചായത്തില് നിന്ന് പഠനമുറി ധനസഹായം ലഭിച്ചിട്ടില്ല എന്ന സാക്ഷ്യപത്രം, വീട് 1000 ചതുരശ്ര അടിയില് താഴെയാണെന്ന സാക്ഷ്യപ്രതം, വീടിന്റെ ഉടമസ്ഥാവകാശം തെളിയിക്കുന്ന സാക്ഷ്യപത്രം, ഫോട്ടോ, ആധാര് കാര്ഡ്, റേഷന് കാര്ഡ്, ബാങ്ക് പാസ്ബുക്ക് എന്നിവയുടെ പകര്പ്പ് സഹിതം അപേക്ഷ ഒക്ടോബര് 19 വൈകിട്ട് അഞ്ചിന് മുമ്പ് ഇലന്തൂര് ബ്ലോക്ക് പട്ടികജാതി വികസന ഓഫീസര്, ഇലന്തൂര് ബ്ലോക്ക്, നെല്ലിക്കാല പി ഒ എന്ന വിലാസത്തില് സമര്പ്പിക്കണം. ഇ-മെയില് [email protected] ഫോണ് 8547630042.
ഗാന്ധിജയന്തി പ്രശ്നോത്തരി
കേരള ഖാദി ഗ്രാമവ്യവസായ ബോര്ഡ് ഗാന്ധിജയന്തിയുമായി ബന്ധപ്പെട്ട് ‘ഗാന്ധിജിയും ഖാദിയും സ്വാതന്ത്ര്യ സമരവും പൊതു വിജ്ഞാനവും’ വിഷയത്തില് സംസ്ഥാനതലത്തില് സംഘടിപ്പിക്കുന്ന പ്രശ്നോത്തരിക്ക് മുന്നോടിയായി ഹൈസ്കൂള്, ഹയര് സെക്കന്ഡറി, സ്കൂള് വിദ്യാര്ഥികള്ക്കായുള്ള ജില്ലാതല പ്രശ്നോത്തരി സെപ്റ്റംബര് 28 രാവിലെ 11 ന് പത്തനംതിട്ട ജില്ല ഖാദി ഗ്രാമ വ്യവസായ ഓഫീസില് നടത്തുന്നു. പ്രശ്നോത്തരിയില് പങ്കെടുക്കുന്ന വിദ്യാര്ഥികള് പേരു വിവരം സെപ്റ്റംബര് 25 വൈകിട്ട് അഞ്ചിനു മുമ്പ് [email protected] യിലോ 0468 2362070 എന്ന ഫോണ് നമ്പരിലോ രജിസ്റ്റര് ചെയ്യണം. ജില്ലാതലത്തില് ഒന്നും രണ്ടും മൂന്നും സ്ഥാനം നേടുന്ന വിജയികള്ക്ക് ക്യാഷ് അവാര്ഡ് നല്കും. ഒന്നും രണ്ടും സ്ഥാനം നേടുന്ന വിജയികള് സംസ്ഥാനതല ക്വിസ് മത്സരത്തിലേക്ക് യോഗ്യത നേടും.
വനിത സ്വയംതൊഴില് വായ്പ
സംസ്ഥാന വനിത വികസന കോര്പ്പറേഷന് ജില്ലയില് സ്ഥിര താമസക്കാരായ ന്യൂനപക്ഷ, പിന്നാക്ക, പട്ടികജാതി, പട്ടികവര്ഗ, പൊതുവിഭാഗത്തിലുള്ള വനിതകള്ക്ക് 30 ലക്ഷം രൂപ വരെ ആറ് മുതല് എട്ട് ശതമാനം വരെ പലിശനിരക്കില് നിബന്ധനകള്ക്ക് വിധേയമായി സ്വയം തൊഴില് വായ്പയും പെണ്കുട്ടികള്ക്ക് വിദ്യാഭ്യാസ വായ്പയും നല്കുന്നു. 18 നും 55 നും ഇടയില് പ്രായമുള്ള തൊഴില് രഹിതരായ വനിതകള്ക്ക് സ്വയം തൊഴില് ചെയ്യുന്നതിന് (വസ്തു/ഉദ്യോഗസ്ഥ ജാമ്യ വ്യവസ്ഥയില്) വായ്പ അനുവദിക്കുന്നു. www.kswdc.org യിലൂടെ അപേക്ഷിക്കാം. ഫോണ് 8281552350.
–
റോഡരികിലെ ചെടികള് നീക്കം ചെയ്യണം
കാല്നട യാത്രക്കാരുടെയും വാഹനയാത്രക്കാരുടെയും സുരക്ഷ കണക്കിലെടുത്ത് റോഡുകളുടെ വശങ്ങളില് നട്ടിട്ടുള്ള ചെടികളും കൃഷിവിളകളും അടിയന്തിരമായി നീക്കം ചെയ്യണമെന്ന് കുളനട ഗ്രാമപഞ്ചായത്ത് സെക്രട്ടറി അറിയിച്ചു.
കുളനട ഗ്രാമപഞ്ചായത്തില് സര്വകക്ഷിയോഗം ചേര്ന്നു
പാതയോരങ്ങളിലും പൊതുസ്ഥലങ്ങളിലും അനധികൃതമായി സ്ഥാപിക്കുന്ന ഫ്ളക്സുകള്, ബോര്ഡുകള്, ബാനറുകള്, കൊടിതോരണങ്ങള് എന്നിവ നീക്കം ചെയ്യുന്നത് സംബന്ധിച്ച കേരള ഹൈക്കോടതി ഉത്തരവും സര്ക്കാര് നിര്ദ്ദേശങ്ങളും ചര്ച്ച ചെയ്യുന്നതിന് കുളനട ഗ്രാമപഞ്ചായത്ത് പ്രസിഡന്റ് പോള് രാജന്റെ അധ്യക്ഷതയില് സര്വകക്ഷി യോഗം ചേര്ന്നു. ഹൈക്കോടതിയുടെ ഉത്തരവും സര്ക്കാര് നിര്ദേശങ്ങളും പഞ്ചായത്ത് സെക്രട്ടറി യോഗത്തില് വിശദീകരിച്ചു. ഗ്രാമപഞ്ചായത്ത് വൈസ് പ്രസിഡന്റ് സാവിത്രി ഭദ്രന്, ആരോഗ്യവിദ്യാഭ്യാസ സ്ഥിരം സമിതി ചെയര്പേഴ്സണ് സുജിത് കളീക്കല്, സെക്രട്ടറി പി. നന്ദകുമാര് വിവിധ രാഷ്ട്രീയ പാര്ട്ടികള്, മതസ്ഥാപന- ക്ഷേത്ര ഭാരവാഹികള്, വ്യാപാരി-വ്യവസായി പ്രതിനിധികള്, സാമൂഹ്യ പ്രവര്ത്തകര് തുടങ്ങിയവര് യോഗത്തില് പങ്കെടുത്തു.
