തിരുവനന്തപുരം : കെഎസ്ആര്ടിസി ഡിപ്പോകളുടെ സമഗ്ര വികസനത്തിനും ജനകീയ പങ്കാളിത്തത്തിനും പുതിയ തുടക്കം കുറിച്ച് സര്ക്കാര്. ഡിപ്പോകളുടെ അടിസ്ഥാന സൗകര്യ വികസനം, യാത്രക്കാര്ക്ക് കൂടുതല് മെച്ചപ്പെട്ട സേവനങ്ങള് ഉറപ്പാക്കല്, ശുചിത്വം, പൊതുസൗകര്യങ്ങള്, കാന്റീന് സേവനങ്ങളുടെ ഗുണനിലവാരം എന്നിവ ഉയര്ത്തുന്നതിനായി എല്ലാ ഡിപ്പോകളിലും ട്രാന്സ്പോര്ട്ട് മാനേജ്മെന്റ് കമ്മിറ്റി രൂപീകരിക്കാന് സര്ക്കാര് അനുമതി നല്കി ഉത്തരവ് പുറപ്പെടുവിച്ചു. ട്രാന്സ്പോര്ട്ട് മാനേജ്മെന്റ് കമ്മിറ്റി രൂപീകരിക്കുന്നതിനുള്ള കരട് ബൈലോ/നിയമാവലി ഉള്പ്പെടുത്തിയ പ്രൊപ്പോസല് കെ.എസ്.ആര്.ടി.സി സര്ക്കാരിന്റെ അംഗീകാരത്തിനായി സമര്പ്പിച്ചിരുന്നു.
പ്രൊപ്പോസല് വിശദമായി പരിശോധിച്ച് കെ.എസ്.ആര്.ടി.സി ചെയര്മാന്; മാനേജിംഗ് ഡയറക്ടര് നോമിനേറ്റ് ചെയ്യുന്ന ഒരു ഉന്നത ഉദ്യോഗസ്ഥനെ കമ്മിറ്റിയില് ഉള്പ്പെടുത്തണമെന്നും അതുസംബന്ധിച്ച വ്യവസ്ഥ ബൈലോയില് ഉള്പ്പെടുത്തണമെന്നുമുള്ള നിബന്ധനയോടെ ട്രാന്സ്പോര്ട്ട് മാനേജ്മെന്റ് കമ്മിറ്റി രൂപീകരിക്കുന്നതിനുള്ള അനുമതിയും നിയമാവലിക്കുള്ള അംഗീകാരവും നല്കി സര്ക്കാര് ഉത്തരവ് പുറപ്പെടുവിച്ചു.
