തിരുവനന്തപുരം : പട്ടികജാതി കുടുംബങ്ങളുടെ വീടുനന്നാക്കാനുള്ള സേഫ് (സെക്യുര്‍ അക്കൊമൊഡേഷന്‍ ആന്‍ഡ് ഫെസിലിറ്റി എന്‍ഹാന്‍സ്മെന്റ്) പദ്ധതി ഈ വര്‍ഷംതന്നെ തുടങ്ങും. പട്ടികജാതി വികസനവകുപ്പ് ഇതിനായി മാര്‍ഗരേഖയും തയ്യാറാക്കിക്കഴിഞ്ഞു. പുതിയ ഭവനപൂര്‍ത്തീകരണ പദ്ധതി ഉടന്‍ നടപ്പാക്കുമെന്ന് പട്ടികജാതി വികസനമന്ത്രി കെ.രാധാകൃഷ്ണന്‍ കഴിഞ്ഞയാഴ്ച നിയമസഭയില്‍ അറിയിച്ചിരുന്നു.
പട്ടികജാതിക്കാരുടേതടക്കമുള്ള വിവിധ ഭവനപദ്ധതികള്‍ ലൈഫില്‍ ലയിപ്പിച്ചു. ലൈഫിന്റെ നടപടികള്‍ വേണ്ടരീതിയില്‍ നടക്കാത്തത് വിവിധ ദുര്‍ബല വിഭാഗങ്ങള്‍ക്ക് വീടു ലഭ്യമാക്കുന്നതില്‍ കാലതാമസമുണ്ടാക്കുന്നെന്നും വിമര്‍ശനാം ഉയരുന്നുണ്ട്. സര്‍ക്കാരിന്റെ സഹായ ധനം ഉപയോഗിച്ചുള്ള വീടുകള്‍ പലപ്പോഴും അവസാനഗഡു കിട്ടാനുള്ള തട്ടിക്കൂട്ട് പൂര്‍ത്തിയാക്കല്‍ മാത്രമായി ഒതുങ്ങുന്നുവെന്ന് പട്ടികജാതിവകുപ്പ്.
ഭൂരിഭാഗം വീടുകളും ഇനിയും പണി തീരാതെ തേയ്ക്കാത്ത, തറയിടാത്ത, വാതിലുകളും ജനലുകളുമൊക്കെ പ്ലാസ്റ്റിക് കൊണ്ടു മറച്ച, നിലത്തു ഭക്ഷണം വെക്കുന്ന, വൃത്തിയുള്ള ശൗചാലയങ്ങളില്ലാത്ത വീടുകള്‍ ഇപ്പോഴും അവശേഷിക്കുന്നു. ഇത് പൂര്‍ണമായും യാഥാര്‍ഥ്യമാക്കുക എന്നതാണ് സേഫിന്റെ ഇപ്പോഴത്തെ ലക്ഷ്യം. പദ്ധതിയില്‍ ഒരു കുടുംബത്തിന് രണ്ടരലക്ഷംരൂപ ലഭ്യമാക്കും. 20 വര്‍ഷംവരെ പഴക്കമുള്ളതും അപൂര്‍ണവുമായ വീടുകള്‍ മുന്‍ഗണനാടിസ്ഥാനത്തില്‍ പരിഗണിക്കുന്നതാണ്.
