ഡല്‍ഹി : മന്ത്രിമാരുടെ പേഴ്സണല് സ്റ്റാഫുകളുടെ പെന്ഷന് പദ്ധതി നിര്‍ത്തലാക്കാന്‍ ഗവര്‍ണര്‍ ആരിഫ് മുഹമ്മദ് ഖാന്‍ ചീഫ് സെക്രട്ടറിക്ക്‌ നിര്‍ദേശം നല്‍കി. കേരളത്തിലെ ജനങ്ങളുടെ നികുതിപ്പണം പേഴ്സണല് സ്റ്റാഫുകള്‍ കൊള്ളയടിക്കുകയാണെന്നും ഒരു മാസത്തിനുള്ളില്‍ ഈ സമ്പ്രദായം അവസാനിപ്പിക്കുമെന്നും അദ്ദേഹം ഡല്‍ഹിയില്‍ പറഞ്ഞു. പേഴ്സണല് സ്റ്റാഫിന്റെ വിവരങ്ങളും ഇതുസംബന്ധിച്ച ഫയലും ഒരാഴ്ചയ്ക്കകം നല്‍കാന്‍ ആവശ്യപ്പെടുന്ന കത്ത് ചീഫ് സെക്രട്ടറിയുടെ ഓഫീസില്‍ ഇതിനോടകം ലഭിച്ചിട്ടുണ്ട്.
രാജ്ഭവനെ നിയന്ത്രിക്കാന്‍ സര്‍ക്കാരിന് അധികാരമില്ല. അത് അംഗീകരിക്കാനാവില്ലെന്നും അദ്ദേഹം പറഞ്ഞു. അങ്ങനെ ശ്രമിച്ചാല്‍ ഭരണഘടനാ പ്രതിസന്ധി ഉണ്ടാകും. സര്‍ക്കാരിനെ ഉപദേശിക്കാനുള്ള ഭരണഘടനാപരമായ അവകാശം ഗവര്‍ണര്‍ക്കുണ്ട്. പെന്ഷന് ആനുകൂല്യം ലക്ഷ്യമിട്ടുള്ള രാഷ്ട്രീയ നിയമനമാണ് പേഴ്സണല് സ്റ്റാഫില്‍ നടക്കുന്നത്. രണ്ടുവര്‍ഷം ജോലിചെയ്താല്‍ മന്ത്രിമാരുടെ പേഴ്സണല് സ്റ്റാഫിന് പെന്ഷന് അര്‍ഹതയുണ്ടെന്ന് മൂന്നുദിവസം മുമ്പാണ് താന്‍ അറിഞ്ഞത്. കേന്ദ്രമന്ത്രിയായിരുന്നപ്പോള്‍ തനിക്ക് 11 പേരാണ് പേഴ്സണല് സ്റ്റാഫിലുണ്ടായിരുന്നത്. കേരളത്തില്‍ എല്ലാ മന്ത്രിമാര്‍ക്കും 20 -ല്‍ അധികം പേരുണ്ട്. മറ്റൊരു സംസ്ഥാനത്തും കോ – ടെര്‍മിനസ് വ്യവസ്ഥയില്‍ നിയമിക്കുന്ന പേഴ്സണല് സ്റ്റാഫിന് പെന്ഷന് ആനൂകൂല്യത്തിന് അര്‍ഹതിയില്ല.
