കൊച്ചി: കേരള സര്വകലാശാലയിലെ സെനറ്റ് അംഗങ്ങളുടെ നോമിനേഷന് പിന്വലിച്ച തീരുമാനത്തെ ന്യായീകരിച്ച് ഹൈക്കോടതിയില് ഗവര്ണര് ആരിഫ് മുഹമ്മദ് ഖാന്റെ സത്യവാങ്മൂലം. വൈസ് ചാന്സലര് നിയമനത്തിലെ കാലതാമസം ഒഴിവാക്കാനാണ് ശ്രമിച്ചത്. സര്വകലാശാല സെനറ്റ് അംഗമെന്ന നിലയില് ചുമതലകളും ഉത്തരവാദിത്തങ്ങളും നിര്വഹിക്കുന്നതില് അംഗങ്ങള് പരാജയപ്പെട്ടതായും ഗവര്ണര് സത്യവാങ്മൂലത്തില് വിശദീകരിക്കുന്നു.
സെലക്ട് കമ്മിറ്റി രൂപീകരിച്ച ചാന്സലറുടെ നിയമാനുസൃതമായ നടപടി സെനറ്റ് വെല്ലുവിളിക്കുന്നതു നിയമവിരുദ്ധമാണ്. സെനറ്റിന്റെ നടപടി കേരള സര്വകലാശാലാ നിയമത്തിലെ വ്യവസ്ഥകള്ക്ക് യോജിച്ചതല്ല. അതു പ്രകടമായ അധിക്ഷേപമാണ്. ചാന്സലര് പുറപ്പെടുവിച്ച വിജ്ഞാപനം പിന്വലിക്കണമെന്ന സെനറ്റിന്റെ ഐകകണ്ഠമായ തീരുമാനത്തില് തന്റെ നോമിനികള് കക്ഷികളാകുന്നത് നിയമവിരുദ്ധമാണ്. നോമിനികള് അധികാരപരിധി വിട്ടാണ് പെരുമാറിയതെന്നും സത്യവാങ്മൂലത്തില് പറയുന്നു. ഹൈക്കോടതി നിര്ദേശത്തില് ചാന്സലര് നാമനിര്ദേശം പിന്വലിച്ചതിന്റെ രേഖകള് ഹാജരാക്കിയിട്ടുണ്ട്.
