തിരുവനന്തപുരം: പൊതുമേഖലാ സ്ഥാപനങ്ങളിലെ പെന്ഷന് പ്രായം ഉയര്ത്തിയതില് ഇടതു മുന്നണിയില് അഭിപ്രായ വ്യത്യാസം. നടപടിക്കെതിരെ സിപിഐ യുവജന സംഘടനയായ എഐവൈഎഫ് രംഗത്തെത്തി. പ്രതികരിക്കാന് ഡിവൈഎഫ്ഐ നേതൃത്വം തയാറായിട്ടില്ല. പ്രതിപക്ഷ സംഘടനകള് ശക്തമായ സമരവുമായി രംഗത്തിറങ്ങാന് തീരുമാനിച്ചിട്ടുണ്ട്. യൂത്ത് കോണ്ഗ്രസ് ഇന്ന് സെക്രട്ടേറിയറ്റിലേക്കു മാര്ച്ച് നടത്തും.
പൊതുമേഖലാ സ്ഥാപനങ്ങളില് വ്യത്യസ്ത വിരമിക്കല് പ്രായമായതിനാലാണ് പെന്ഷന് പ്രായം 60 ആക്കി ഏകീകരിക്കാന് തീരുമാനിച്ചതെന്ന് ധനവകുപ്പ് വിശദീകരിക്കുന്നു. കെഎസ്ഇബി, ജല അതോറിറ്റി, കെഎസ്ആര്ടിസി എന്നീ പൊതുമേഖലാ സ്ഥാപനങ്ങളുടെ പെന്ഷന് പ്രായം തല്ക്കാലം വര്ധിപ്പിച്ചിട്ടില്ല. ഈ സ്ഥാപനങ്ങളില് ഇതിനെക്കുറിച്ച് പഠിക്കാന് വിദഗ്ധ സമിതിയെ നിയോഗിച്ചു.
122 പൊതുമേഖലാ സ്ഥാപനങ്ങളിലും 6 ധനകാര്യ കോര്പറേഷനുകളിലുമായി ഒന്നര ലക്ഷത്തോളം ജീവനക്കാരാണുള്ളത്. പൊതുമേഖലാ സ്ഥാപനങ്ങളിലെ പെന്ഷന് പ്രായം അറുപതായി വര്ധിപ്പിച്ച ഉത്തരവ് പ്രതിഷേധാര്ഹമാണെന്നും അഭ്യസ്തവിദ്യരായ പതിനായിരക്കണക്കിനു ചെറുപ്പക്കാരെ പ്രതിരോധത്തിലാക്കുന്ന നടപടിയാണ് ഇതെന്നും എഐവൈഎഫ് സംസ്ഥാന കമ്മിറ്റി പ്രസ്താവനയില് പറഞ്ഞു.
