തിരുവനന്തപുരം : ഷാരോണ് ഗ്രീഷ്മയെ താലികെട്ടിയത് വെട്ടുകാട് പള്ളിയില് വെച്ച്. തെളിവെടുപ്പിനായി പോലീസ് സംഘം ഗ്രീഷ്മയെ തിങ്കളാഴ്ച വെട്ടുകാടെത്തിച്ചപ്പോള് യാതൊരു സങ്കോചവുമില്ലാതെ കുറ്റസമ്മതം നടത്തുകയായിരുന്നു. വെട്ടുകാട് പള്ളിയിലും പരിസരത്തും ഇവര് വിശ്രമിച്ച വേളി ടൂറിസ്റ്റ് വില്ലേജിലുമായാണ് തെളിവെടുപ്പു നടത്തിയത്. ഷാരോണ് ബൈക്കില് കയറ്റിയാണ് തന്നെ ഇവിടേക്കു കൊണ്ടുവന്നതെന്ന് ഗ്രീഷ്മ പറഞ്ഞു.
വെട്ടുകാട് പള്ളിക്കുള്ളില് കയറിയപ്പോള് താലികെട്ടാനായി തങ്ങള് ഇരുന്ന ബഞ്ച് പ്രതി ചൂണ്ടിക്കാട്ടി. പലയിടത്തും ഒരുമിച്ചു കറങ്ങിനടക്കുമ്പോള് കമിതാക്കളാണെന്ന മട്ടിലുള്ള തുറിച്ചുനോട്ടങ്ങള് നേരിടേണ്ടി വരാറുണ്ടായിരുന്നെന്നും അതൊഴിവാക്കാനാണ് എന്നു പറഞ്ഞാണ് താലി കെട്ടിയതെന്നും ഗ്രീഷ്മ പറഞ്ഞു. അവിടെവച്ച് നെറ്റിയില് സിന്ദൂരവും ചാര്ത്തി. തുടര്ന്ന് അവര് പോയ പള്ളിക്കു സമീപത്തെ ബീച്ചിലെത്തിച്ചു.
അന്വേഷണോദ്യോഗസ്ഥരോടു പൂര്ണമായും സഹകരിച്ച ഗ്രീഷ്മ. വിശദമായി സംഭവങ്ങള് വിവരിച്ചു. അടുത്ത ദിവസം ഗ്രീഷ്മയെ തൃപ്പരപ്പിലെത്തിച്ച് തെളിവെടുപ്പു നടത്തും. താലികെട്ടിയതിനെ തുടര്ന്ന് ഇവര് ഒരുമിച്ച് മൂന്നു ദിവസം തൃപ്പരപ്പ് ശിവലോകം ഡാമിനു സമീപമുള്ള റിസോര്ട്ടില് താമസിച്ചിരുന്നതായാണ് ഗ്രീഷ്മ മൊഴിനല്കിയിട്ടുള്ളത്. ഈ റിസോര്ട്ടിലെത്തിച്ചായിരിക്കും തെളിവെടുപ്പ്.