തിരുവനന്തപുരം: കോണ്ഗ്രസിലെ പ്രശ്നങ്ങള് പറഞ്ഞുതീര്ക്കുമെന്ന് കെപിസിസി പ്രസിഡന്റ് കെ സുധാകരന്. ഗ്രൂപ്പ് യോഗം ചേര്ന്നോ ഇല്ലയോ എന്ന് തനിക്ക് അറിയില്ലെന്നും സുധാകരന് പറഞ്ഞു. കടല് ഇളകി വന്നിട്ടും കോണ്ഗ്രസ് അത് പരിഹരിച്ചിട്ടുണ്ട്. കൊടുങ്കാറ്റ് വീശിയിട്ടും ഒന്നും സംഭവിച്ചിട്ടില്ല, പ്രശ്നങ്ങള് പരിഹരിക്കും എന്നും കെ സുധാകരന് പ്രതികരിച്ചു. കുറച്ചുമുന്പാണ് കോണ്ഗ്രസ് നേതൃത്വത്തെ വെല്ലുവിളിച്ച് എ, ഐ ഗ്രൂപ്പ് നേതാക്കള് തിരുവനന്തപുരത്ത് സംയുക്ത യോഗം ചേര്ന്നത്. പരാതിക്കാരെ നേരില് കാണുമെന്നും പാര്ട്ടിയില് സൗഹൃദപരമായ അന്തരീക്ഷം ഉണ്ടാക്കുമെന്നും കെ സുധാകരന് തിരുവനന്തപുരത്ത് മാധ്യമങ്ങളോട് പറഞ്ഞു.
ചര്ച്ച നടത്തിയില്ല എന്ന് പറയുന്നത് ശുദ്ധ നുണയാണ്. എംഎം ഹസനെയെയും രമേശ് ചെന്നിത്തലയെയും ഇന്ന് കാണും. പ്രതിപക്ഷ നേതാവ് ഒരു പാതകവും ചെയ്തിട്ടില്ല. ഇതുപോലെ ചര്ച്ച നടത്തിയ മറ്റൊരു പുനസംഘടന കോണ്ഗ്രസ് ചരിത്രത്തില് ഉണ്ടായിട്ടില്ല. പാര്ട്ടിയില് വനിതാ പ്രാതിനിധ്യം ഉണ്ട്. അഭിപ്രായ വ്യത്യാസങ്ങള് ഉണ്ടാകുന്നത് സ്വാഭാവികമാണ്. അത് മാധ്യമങ്ങള് കൊട്ടിഘോഷിക്കേണ്ട എന്നും അദ്ദേഹം പ്രതികരിച്ചു.
