പീരുമേട്: ലോകത്തിലെ മുപ്പതിലധികം രാജ്യങ്ങളിൽ നിന്നായി നൂറിലധികം മുൻനിര കമ്പനികളുടെ വൈവിധ്യമാർന്ന തേയില സഷേ പാക്കറ്റുകൾ ശേഖരിച്ച് ലോക റെക്കോർഡ് ജേതാവായ ഗിന്നസ് സുനിൽ ജോസഫ് ശ്രദ്ധേയനാകുന്നു. മേയ് 21 അന്താരാഷ്ട്ര തേയില ദിനമായി ആചരിക്കുന്ന പശ്ചാത്തലത്തിലാണ് ചായയോടുള്ള തന്റെ അടങ്ങാത്ത അഭിനിവേശം അപൂർവ്വമായ ഈ ശേഖരണത്തിലൂടെ അദ്ദേഹം പ്രകടിപ്പിച്ചത്. ലോകത്തിന്റെ വിവിധ കോണുകളിൽ നിന്നുള്ള പ്രമുഖ ബ്രാൻഡുകളുടെ ചായപ്പൊടി പാക്കറ്റുകളാണ് ഈ സവിശേഷമായ ശേഖരത്തിലുള്ളത്. ആഗോളതലത്തിൽ വെള്ളം കഴിഞ്ഞാൽ മനുഷ്യൻ ഏറ്റവും കൂടുതൽ കുടിക്കുന്ന പാനീയമായ ചായയുടെ പ്രാധാന്യവും തേയില വ്യവസായത്തിന്റെ സുസ്ഥിരതയും ചർച്ച ചെയ്യുന്ന ദിനമാണ് അന്താരാഷ്ട്ര തേയില ദിനം.
ലോകമെമ്പാടുമുള്ള ദശലക്ഷക്കണക്കിന് വരുന്ന തോട്ടം തൊഴിലാളികളുടെയും ചെറുകിട കർഷകരുടെയും ക്ഷേമം ഉറപ്പാക്കാനും ദാരിദ്ര്യ നിർമ്മാർജ്ജനത്തിൽ തേയില മേഖല വഹിക്കുന്ന പങ്ക് ഉയർത്തിക്കാട്ടാനും യുഎൻ ആഹ്വാനം ചെയ്യുന്ന ഈ ദിനത്തിൽ സുനിൽ ജോസഫിന്റെ ഈ വേറിട്ട ശേഖരം തേയിലയുടെ ആഗോള സാംസ്കാരിക വൈവിധ്യത്തിലേക്കാണ് വിരൽ ചൂണ്ടുന്നത്. ഇടുക്കിയിലെയും പീരുമേട്ടിലെയും പാരമ്പര്യമുള്ള വലിയ തോട്ടങ്ങളുടെ ചരിത്ര പശ്ചാത്തലത്തിൽ വൈവിധ്യമാർന്ന തേയില സംസ്കാരങ്ങളെ പരിചയപ്പെടുത്തുന്ന ഇത്തരം ശേഖരങ്ങൾ ഏറെ പ്രാധാന്യമർഹിക്കുന്നു. ലോക റെക്കോർഡുകളുടെ നെറുകയിൽ തൊട്ട സുനിൽ ജോസഫിന്റെ ഈ പുതിയ നേട്ടം അന്താരാഷ്ട്ര തേയില ദിനാചരണത്തിന് മനോഹരമായൊരു തിളക്കമാണ് സമ്മാനിച്ചിരിക്കുന്നത്.
