അഹമ്മദാബാദ് : ഗുജറാത്തില് കൊവിഡ് ബാധിതരുടെ എണ്ണം 1000 കടന്നു. 12 മണിക്കൂറിനിടെ 176 കേസുകള് സ്ഥിരീകരിച്ചതോടെ സംസ്ഥാനത്ത് കൊവിഡ് ബാധിതരുടെ എണ്ണം 1,275 ആയി. സംസ്ഥാന ആരോഗ്യ മന്ത്രാലയമാണ് ഇതു സംബന്ധിച്ച് വിവരങ്ങള് പുറത്തുവിട്ടത്. മൂന്നു പുതിയ മരണങ്ങള് കൂടി റിപ്പോര്ട്ടു ചെയ്തതോടെ കൊവിഡ് ബാധിച്ച് ഗുജറാത്തില് മരിച്ചവരുടെ എണ്ണം 41 ആയി ഉയര്ന്നു.
രോഗം സ്ഥിരീകരിച്ച 170 പേരില് 77 പേരും അഹമ്മദാബാദിലുള്ളവരാണ്. സൂറത്തില് 14 പേര്ക്കും കൊവിഡ് സ്ഥിരീകരിച്ചു. അതേസമയം ഗുജറാത്ത് സര്ക്കാര് രോഗം ഭേദമായവരുടെ പ്ലാസ്മയില് നിന്നും ആന്റിബോഡിയെടുത്ത് രോഗമുള്ളവരില് കുത്തിവെക്കുന്ന പ്ലാസ്മ ദാന പ്രക്രിയ ആരംഭിക്കുന്നതിനുള്ള നടപടികളും സ്വീകരിച്ച് വരുന്നതായി അറിയിച്ചിട്ടുണ്ട്. രാജ്യത്ത് കൊവിഡ് ബാധിതരുടെ എണ്ണം 14,000 കടന്നു. 480 പുതിയ കേസുകള് കൂടി റിപ്പോര്ട്ടു ചെയ്തതോടെ രാജ്യത്ത് കൊവിഡ് ബാധിച്ചവരുടെ എണ്ണം 14,378 ആയി.