കോട്ടയം: നഗരത്തില് സിമന്റ് കവലയില് വെച്ചാണ് ഉച്ചയ്ക്ക് 12:30 യോടെ നാടകീയ രംഗങ്ങള് അരങ്ങേറിയത്. കോട്ടയത്ത് നിന്നും ചങ്ങനാശ്ശേരിക്ക് ഷൂട്ടിനു പോയ വാര്ത്താ സംഘത്തിന് നേരെയാണ് രണ്ടംഗസംഘം അതിക്രമം നടത്തിയത്. എംസി റോഡില് യാത്ര ചെയ്ത് മുന്നോട്ടുപോകുമ്പോൾ ഇടവഴിയില് നിന്ന് കയറിവന്ന സംഘം മാധ്യമ പ്രവര്ത്തകര് വന്ന വാഹനത്തില് ഇടിക്കാന് ശ്രമിച്ചതോടെയാണ് സംഭവങ്ങള്ക്ക് തുടക്കം. മാധ്യമപ്രവര്ത്തകരുടെ സംഘം മുന്നോട്ടു പോയപ്പോള് വീണ്ടും അപകടകരമായ രീതിയില് വാഹനം ഓടിച്ച് അതിക്രമം നടത്താന് ശ്രമിച്ചു. ഇതോടെ റിപ്പോര്ട്ടര് മനീഷ് പുറത്തിറങ്ങി ചോദ്യം ചെയ്യാന് തയ്യാറായി. ഇതിനിടെയാണ് മാധ്യമപ്രവര്ത്തകരെ ഞെട്ടിച്ചുകൊണ്ട് കൊറോള കാറില് എത്തിയ സംഘം തോക്ക് ചൂണ്ടി ഭീഷണിപ്പെടുത്തിയത്.
