തൃശ്ശൂര് : ഗുരുവായൂര് ക്ഷേത്രം പ്രധാന തന്ത്രി പുഴക്കര ചേന്നാസ് നാരായണന് നമ്പൂതിരിപ്പാട് (70) അന്തരിച്ചു. ചൊവ്വാഴ്ച പുലര്ച്ചെയായിരുന്നു അന്ത്യം. തൃശ്ശൂരില് സ്വകാര്യ ആശുപത്രിയില് ചികിത്സയിലായിരുന്നു. 2013 ഡിസംബര് 26-ന് ചേന്നാസ് വാസുദേവന് നമ്പൂതിരിപ്പാടിന്റെ നിര്യാണത്തെത്തുടര്ന്നാണ് ചേന്നാസ് മനയിലെ മുതിര്ന്ന അംഗമായ നാരായണന് നമ്പൂതിരിപ്പാട് പ്രധാന തന്ത്രിയായി സ്ഥാനമേറ്റത്.
2014 ഫെബ്രുവരി 20-ന് ശ്രീലകത്തുകയറി ആദ്യപൂജ നിര്വഹിച്ചു. ദീര്ഘകാലം ഗുരുവായൂര് ക്ഷേത്രത്തില് പ്രധാന തന്ത്രിയായിരുന്ന ചേന്നാസ് പരമേശ്വരന് നമ്പൂതിരിപ്പാടിന്റെയും ശ്രീദേവി അന്തര്ജനത്തിന്റെയും മൂത്തമകനാണ് നാരായണന് നമ്പൂതിരിപ്പാട്. പ്രധാന തന്ത്രിയാകുന്നതിനുമുമ്പ് കുറച്ചുകാലം നെടുങ്ങാടി ബാങ്കില് ഉദ്യോഗസ്ഥനായിരുന്നു. ചെങ്ങന്നൂര് മിത്രമഠത്തിലെ സുചിത്രാ അന്തര്ജനമാണ് ഭാര്യ.
ഗുരുവായൂര് ക്ഷേത്രത്തിലെ താന്ത്രികച്ചടങ്ങുകള് നിര്വഹിയ്ക്കുന്ന ശ്രീകാന്ത് നമ്പൂതിരിപ്പാട് ഏകമകനാണ്. മരുമകള് – പിറവം മ്യാല്പ്പള്ളി ഇല്ലത്ത് അഖിലാ അന്തര്ജനം. സഹോദരങ്ങള് – ഉമാദേവി അന്തര്ജനം (പട്ടത്ത്മന, തിരുവുള്ളക്കാവ്), രാധാ അന്തര്ജനം (ഏലംകുളം മന), രജനി അന്തര്ജനം (പകരാവൂര് മന), കൃഷ്ണന് നമ്പൂതിരിപ്പാട് (ചാര്ട്ടേഡ് അക്കൗണ്ടന്റ്), ഗുരുവായൂര് ക്ഷേത്രത്തില് താന്ത്രിക ചടങ്ങുകള് നിര്വഹിക്കുന്ന ഹരി നമ്പൂതിരിപ്പാട്, ഡോ. അരവിന്ദാക്ഷന് നമ്പൂതിരിപ്പാട്.
