വടകര : അതിഥി മന്ദിരത്തില് മന്ത്രിയുടെ പരിശോധനയില് മദ്യക്കുപ്പി കണ്ടെത്തിയ സംഭവത്തില് രണ്ട് താല്കാലിക ജീവനക്കാരെ പുറത്താക്കി. വാച്ചര്മാരായ പി.കെ പ്രകാശന് , സി.എം ബാബു എന്നിവര്ക്കെതിരെയാണ് ചീഫ് എന്ജിനീയര് നടപടി സ്വീകരിച്ചത്. ഇവര്ക്ക് പകരം രണ്ട് പേരെ പുതുതായി നിയമിക്കാന് എക്സിക്യൂട്ടീവ് എന്ജിനീയര്ക്ക് നിര്ദേശം നല്കി.
ഇക്കഴിഞ്ഞ 27ന് രാവിലെ പത്തര മണിയോടെയാണ് പൊതുമരാമത്ത് മന്ത്രി പി.എ മുഹമ്മദ് റിയാസ് വടകര പഴയ സ്റ്റാന്ഡ് പരിസരത്തെ അതിഥി മന്ദിരത്തിലെത്തിയത്. മലിനമായി കിടന്ന അതിഥി മന്ദിരത്തിന്റെ പരിസരത്തെ മാലിന്യങ്ങള്ക്കിടയില് ഒഴിഞ്ഞ മദ്യക്കുപ്പികള് മന്ത്രിയുടെ ശ്രദ്ധയില് പെട്ടു. സംഭവത്തില് ജീവനക്കാര്ക്കെതിരെ നടപടി സ്വീകരിക്കാന് മന്ത്രി ചീഫ് എന്ജിനീയര്ക്ക് നിര്ദേശം നല്കി. ഇതിന്റെ അടിസ്ഥാനത്തിലാണ് രണ്ടു പേര്ക്കെതിരെ നടപടി സ്വീകരിച്ചത്.
