ആലപ്പുഴ: ആലപ്പുഴയിൽ നാലുചിറ പാലം ഉദ്ഘാടനത്തിലേക്ക് മുതിർന്ന സിപിഎം നേതാവ് ജി സുധാകരനെ വീട്ടിൽ എത്തി ക്ഷണിച്ച് എച്ച് സലാം എംഎൽഎ. ഉദ്ഘാടന ചടങ്ങിന്റെ ക്ഷണക്കത്തും നോട്ടീസും കൈമാറി. സലാം എത്തിയപ്പോൾ സുധാകരൻ വീട്ടിൽ ഉണ്ടായിരുന്നില്ല. ക്ഷണക്കത്ത് വീട്ടിൽ ഏൽപിച്ച് മടങ്ങുകയായിരുന്നു. ചടങ്ങിൽ ജി സുധാകരൻ പങ്കെടുക്കുമോ എന്നതിൽ വ്യക്തതയില്ല. നാളെ രാവിലെ 11.30 യ്ക്ക് മുഖ്യമന്ത്രിയാണ് പാലം ഉദ്ഘാടനം ചെയ്യുക.
കഴിഞ്ഞ ദിവസം ഉദ്ഘാടനത്തിന് തയ്യാറാക്കിയ നോട്ടീസിൽ ജി സുധാകരന്റെ പേരും ചിത്രവും ഉള്പ്പെടുത്തിയിരുന്നു. വര്ഷങ്ങള്ക്കുശേഷമാണ് സര്ക്കാര് പരിപാടിയിൽ മുതിര്ന്ന സിപിഎം നേതാവ് ജി സുധാകരന്റെ പേരും ചിത്രവും ഉള്പ്പെടുന്നത്. ഉദ്ഘാടന പരിപാടിയിൽ പങ്കെടുക്കുന്നവരുടെ ലിസ്റ്റിലാണ് ജി സുധാകരന്റെ പേരും ഉള്പ്പെടുത്തിയിരിക്കുന്നത്. ജി സുധാകരൻ പൊതുമരാമത്ത് മന്ത്രിയായിരിക്കെയാണ് നാലുചിറ പാലം കൊണ്ടുവന്നത്. അതൃപ്തി തുടരുന്ന ജി സുധാകരനെ നേരത്തെ സിപിഎം നേതാക്കള് അനുനയിപ്പിക്കാൻ ശ്രമിച്ചിരുന്നു. എന്നാൽ കുട്ടനാട്ടിൽ നടന്ന സിപിഎം പരിപാടിയിൽ നിന്നും സുധാകരൻ വിട്ടുനിൽക്കുകയായിരുന്നു.
