മല്ലപ്പള്ളി : മല്ലപ്പള്ളി ബ്ലോക്ക് പഞ്ചായത്ത് പരിധിയിലുള്ള പൂർത്തീകരിച്ച പിഎംഎവൈ വീടുകളുടെ താക്കോൽദാനവും ടോയ്ലെറ്റ് കോംപ്ലക്സുകളുടെ ഉദ്ഘാടനവും അഡ്വ. മാത്യു റ്റി. തോമസ് എംഎൽഎ നിർവഹിച്ചു. ബ്ലോക്ക് പഞ്ചായത്ത് പ്രസിഡന്റ് ബാബു കൂടത്തിൽ അധ്യക്ഷത വഹിച്ചു. കുന്നന്താനം, മല്ലപ്പള്ളി ഗ്രാമപ്പഞ്ചായത്തുകളിലായി നിർമാണം പൂർത്തിയായ അഞ്ച് വീടുകളുടെ താക്കോൽദാനമാണ് നിർവഹിച്ചത്. ബ്ലോക്ക് പഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി 42.5 ലക്ഷം രൂപ ചെലവഴിച്ച് കൊറ്റനാട് എസ്സിവി ഹയർ സെക്കൻഡറി സ്കൂൾ, ആഞ്ഞിലിത്താനം ഗവ.എൽപിഎസ്, പുതുശ്ശേരി ഗവ.എൽപിഎസ്, കുന്നന്താനം (ചക്കുംമൂട്) ഗവ.എൽപിഎസ് ബ്ലോക്ക് പഞ്ചായത്ത് വളപ്പ് എന്നിവിടങ്ങളിലാണ് ടോയ്ലെറ്റ് കോംപ്ലക്സുകൾ പൂർത്തിയാക്കിയത്.
വികസനകാര്യ സ്ഥിരം സമിതി അധ്യക്ഷൻ അഡ്വ. പ്രകാശ് ചരളേൽ, മല്ലപ്പള്ളി ഗ്രാമപ്പഞ്ചായത്ത് പ്രസിഡന്റ് എസ്. വിദ്യാമോൾ, കവിയൂർ ഗ്രാമപ്പഞ്ചായത്ത് പ്രസിഡന്റ് എം.ഡി. ദിനേശ്കുമാർ, ആനിക്കാട് ഗ്രാമപ്പഞ്ചായത്ത് പ്രസിഡന്റ് സൂസൻ ഡാനിയൽ, ബ്ലോക്ക് പഞ്ചായത്ത് വൈസ് പ്രസിഡന്റ് ആനി രാജു, ജില്ലാ പഞ്ചായത്ത് അംഗം സി.കെ. ലതാകുമാരി, ജ്ഞാനമണി മോഹൻ, എസ്. ഗിരീഷ് കുമാർ തുടങ്ങിയവർ പ്രസംഗിച്ചു.
