കോന്നി : കോന്നി ചൈനാമുക്കിൽ വാഹനം ഇടിച്ചുതകർന്ന പുനലൂർ മൂവാറ്റുപുഴ സംസ്ഥാന പാതയുടെ കൈവരികൾ കാൽനടയാത്രക്കാർക്ക് ഭീഷണിയാകുന്നു. ചൈനാ മുക്ക് എസ് എൻ ഡി പിക്ക് സമീപമാണ് ആഴ്ചകൾക്ക് മുൻപ് നിയന്ത്രണം വിട്ടുവന്ന കാർ രാത്രിയിൽ റോഡിലെ കൈവരിയിലേക്ക് ഇടിച്ചു കയറിയത്. ഇടിയുടെ ശക്തിയിൽ ഇരുമ്പ് പൈപ്പ് ഉപയോഗിച്ച് നിർമ്മിച്ച കൈവരികൾ ഒടിയുകയും ചെയ്തു. എന്നാൽ ഒടിഞ്ഞുമാറിയ പൈപ്പിന്റെ ഭാഗങ്ങൾ നടപ്പാതയിൽ കുന്തമുനപോലെ നിൽക്കുന്നത് ബന്ധപ്പെട്ടവർ നീക്കം ചെയ്യുവാൻ തയ്യാറാകാത്തത് കാൽ നടയാത്രക്കാർക്ക് വലിയ ഭീഷണിയാണ് ഉയർത്തുന്നത്.
പൈപ്പിന്റെ കൂർത്ത ഭാഗം ആളുകളുടെ കാലിൽ തട്ടാതിരിക്കാൻ സമീപത്തെ വ്യാപാരി പ്ലാസ്റ്റിക്ക് കുപ്പി മുറിച്ച് മുനയുള്ള ഭാഗം അടച്ചുവെച്ചിരിക്കുകയാണ് ഇപ്പോൾ. റോഡിലെ സിഗ്നൽ ബോർഡും അപകടത്തിൽ തകർന്നുപോയിരുന്നു. സ്കൂൾ – കോളേജ് വിദ്യർത്ഥികൾ ഉൾപ്പെടെ നടന്നുപോകുന്ന നടപ്പാതയിൽ ആണ് ഈ അപകടം പതിയിരിക്കുന്നത് എന്നതാണ് ശ്രദ്ധേയമായ കാര്യം. സംസ്ഥാന പാതയിൽ പലയിടത്തും ഇത്തരത്തിൽ നടപ്പാതകളിൽ അപകടകരമായി നിൽക്കുന്ന കൂർത്ത കമ്പികൾ എത്രയും വേഗം നീക്കം ചെയ്യേണ്ടത് ആവശ്യമാണ്.