യുനാന്‍: കൊറോണയ്ക്ക് പിന്നാലെ ചൈനയില്‍ നിന്ന് ഒരു പുതിയ വൈറസ് ഭീതി. ചൈനയിലെ യുനാന്‍ പ്രവിശ്യയില്‍ ഒരാള്‍ക്ക് ഹാന്റ വൈറസ് പരിശോധനയില്‍ പോസിറ്റീവ് ഫലം കണ്ടെത്തുകയും ഇയാള്‍ കഴിഞ്ഞ ദിവസം മരിക്കുകയും ചെയ്തതോടെയാണ് പരിഭ്രാന്തി പരന്നിരിക്കുന്നത്. മറ്റ് 32 പേരുടെ സാമ്പിളുകള്‍ പരിശോധനയ്ക്ക് അയച്ചിരിക്കുകയാണെന്നും റിപ്പോര്‍ട്ട് പറയുന്നു.
ഹാന്റ വൈറസ് സോഷ്യല്‍ മീഡിയയില്‍ ഭീതിയുടെ ട്രെന്‍ഡായി മാറി. കൊറോണ വൈറസിന് പിന്നാലെ പകര്‍ച്ചവ്യാധി ഉണ്ടാക്കാന്‍ തയ്യാറായ മറ്റൊരു വൈറസാണോ എന്ന സംശയമായിരുന്നു ആളുകളുടെ പരിഭ്രാന്തിക്ക് കാരണം. എന്നാല്‍ അത്ര ഭയക്കേണ്ട ഒന്നല്ല ഈ വൈറസ്. കാരണം മരണസാദ്ധ്യത ഉണ്ടെങ്കിലും കൊറോണയെപ്പോലെ പകര്‍ച്ച വ്യാധിയായി പകരുന്നവയല്ല ഇതെന്നതാണ് കണ്ടെത്തല്‍.
എലികളും അണ്ണാനും ഉള്‍പ്പെടുന്ന മൂഷികവര്‍ഗത്തില്‍പ്പെട്ട ജീവികളാണ് ഈ വൈറസിന്റെ ഉറവിടം. നല്ല ആരോഗ്യമുള്ളവര്‍ക്കും ഈ വൈറസ് ബാധയുണ്ടാവാന്‍ സാദ്ധ്യതയേറെയാണ്. അതേസമയം ഒരു വ്യക്തിയില്‍ നിന്ന് മറ്റൊരു വ്യക്തിയിലേയ്ക്ക് ഈ വൈറസ് പകരില്ലെന്നാണ് സെന്റര്‍ ഫോര്‍ ഡിസീസ് കണ്‍ട്രോള്‍ വ്യക്തമാക്കുന്നത്.
