കണ്ണൂര് : തലശ്ശേരില് ഹരിദാസിനെ വെട്ടി കൊലപ്പെടുത്തിയ സംഭവത്തില് ബിജെപി ആര്എസ്എസ് പ്രവര്ത്തകരായ നാലുപേര് കൂടി അറസ്റ്റിലായി. വിമിന്, അമല് മനോഹരന്, സുമേഷ്, ലിജേഷ് എന്നിവരാണ് അറസ്റ്റിലായത്. കൊമ്മല് വാര്ഡ് കൗണ്സിലര് ആയ ലിജേഷ് ബിജെപി മണ്ഡലം പ്രസിഡന്റ് കൂടിയാണ്. ഗൂഢാലോചന നടത്തിയതിനാണ് ഇവര് അറസ്റ്റിലായത്. ഇവര് സഞ്ചരിച്ച ബൈക്ക് കണ്ട് പിടിക്കാനുള്ള ശ്രമവും പോലീസ് ഊര്ജിതമാക്കി. പ്രതികള്ക്ക് നേരിട്ട് കൊലപാതകത്തില് പങ്കുണ്ടോ എന്നാണ് പോലീസിന്റെ അന്വേഷണം. സിപിഎം പ്രവര്ത്തകനും മത്സ്യതൊഴിലാളിയുമായ ഹരിദാസനെ ഇന്നലെ പുലര്ച്ചെ ജോലി കഴിഞ്ഞ് മടങ്ങി വീട്ടിലെത്തിയതിന് പിന്നാലെയാണ് വെട്ടിക്കൊലപ്പെടുത്തിയത്. ആക്രമണത്തിന് പിന്നില് ബിജെപി യെന്നാണ് കൊലപാതകം നടന്നതു മുതല് സിപിഎം ആരോപിക്കുന്നത്.
