കൊച്ചി : തൃക്കാക്കര ഉപതെരഞ്ഞെടുപ്പിലെ യു.ഡി.എഫ് സ്ഥാനാര്‍ഥി ഉമ തോമസിന്റെ നാമനിര്‍ദേശ പത്രിക തള്ളണമെന്ന ഹർജി ഹൈകോടതി തള്ളി. ഉമ തോമസിന്റെ ഭര്‍ത്താവ് മുന്‍ എം.എല്‍.എ പി.ടി. തോമസിന് ബാങ്കുകളില്‍ വായ്പാ കുടിശ്ശികയുള്ളതും കൊച്ചി നഗരസഭയിലെ ഭൂമിക്ക് നികുതി കുടിശ്ശികയുള്ളതും മറച്ചുവെച്ചാണ് പത്രിക നല്‍കിയതെന്ന് കാട്ടി സ്വതന്ത്ര സ്ഥാനാര്‍ഥി കടവന്ത്ര സ്വദേശി സി.പി. ദിലീപ് നായര്‍ നല്‍കിയ ഹർജിയാണ് ജസ്റ്റിസ് എന്‍. നഗരേഷ് തള്ളിയത്. തെരഞ്ഞെടുപ്പ് ഹർജിയായാണ് നല്‍കേണ്ടതെന്നും റിട്ട് ഹർജി നിലനില്‍ക്കില്ലെന്നും വ്യക്തമാക്കിയാണ് ഉത്തരവ്. റിട്ടേണിങ് ഓഫീസര്‍ക്ക് പരാതി നല്‍കിയെങ്കിലും നിരസിച്ചതിനെ തുടര്‍ന്നാണ് ഹൈകോടതിയെ സമീപിച്ചത്.
