ചാത്തന്നൂർ : വർക്ക്ഷോപ്പ് മാനേജരെ സ്പ്രേപെയിന്റിങ് ഗൺ കൊണ്ട് തലയ്ക്കടിച്ചു കൊലപ്പെടുത്താൻ ശ്രമിച്ച ജീവനക്കാരനെ പാരിപ്പള്ളി പോലീസ് പിടികൂടി. പാരിപ്പള്ളി പാമ്പുറം എസ്.എസ് ഭവനിൽ സുമേഷ് (25) ആണ് അറസ്റ്റിലാത്. തെറ്റിക്കുഴിയിലുള്ള വാഹന വർക്ക്ഷോപ്പിലെ മാനേജരായ അഭിലാഷിനെയാണ് ഇയാൾ ആക്രമിച്ചത്. കഴിഞ്ഞ ആറിനായിരുന്നു കേസിനാസ്പദമായ സംഭവം. തൊഴിലുമായി ബന്ധപ്പെട്ട് ഇരുവരും തമ്മിലുണ്ടായ തർക്കമാണ് കൊലപാതകശ്രമത്തിൽ കലാശിച്ചത്.
ജോലിസമയത്ത് അലസമായി ഇരുന്നത് മാനേജർ ചോദ്യം ചെയ്തതിന്റെ വിരോധത്തിൽ ജോലികഴിഞ്ഞ് വീട്ടിലേക്ക് മടങ്ങുകയായിരുന്ന അഭിലാഷിനെ തടഞ്ഞുനിർത്തി ആക്രമിക്കുകയായിരുന്നു. പ്രതിയെ പാമ്പുറത്തുനിന്ന് പാരിപ്പള്ളി ഇൻസ്പെക്ടർ അൽജബാറിന്റെ നേതൃത്തിലുള്ള പോലീസ് സംഘം പിടികൂടുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
