കോന്നി : കനത്ത മഴയിൽ കോന്നിയിൽ പല സ്ഥലങ്ങളിലും നാശനഷ്ടങ്ങള്. ഇന്നലെ അഞ്ച് മണിയോടെ ആരംഭിച്ച മഴയെ തുടർന്ന് പുനലൂർ – മൂവാറ്റുപുഴ സംസ്ഥാന പാതയിൽ വകയാർ ഭാഗത്ത് റോഡിൽ വെള്ളം കയറി ഗതാഗതം തടസ്സപ്പെട്ടു. കോന്നി സെൻട്രൽ ജംഗ്ഷനിലും കോന്നി ആനക്കൂട് റോഡിലും കോന്നി വൈ എം സി എ റോഡിലും വെള്ളം കയറി. പുനലൂർ – മൂവാറ്റുപുഴ സംസ്ഥാന പാത നിർമ്മാണ പ്രവർത്തനങ്ങൾ നടക്കുന്നതിനാൽ ഓടകൾ പലയിടങ്ങളിലും മുറിഞ്ഞുകിടക്കുകയാണ്. ഇത് വെള്ളം ഒഴുകി പോകുന്നതിന് തടസം സൃഷിടിക്കുന്നുണ്ട്.
ചെറിയ ഒരു മഴ പെയ്താൽ പോലും റോഡിൽ വെള്ളം കയറുകയാണ്. കോന്നി വട്ടക്കാവ് മുരുപ്പേൽപുത്തൻവീട്ടിൽ അബ്ദുൽ ലത്തീഫിന്റെ വീടിന്റെ സംരക്ഷണ ഭിത്തി മഴയിൽ ഇടിഞ്ഞു. റവന്യു സംഘം സ്ഥലം സന്ദർശിച്ചു. കോന്നി എസ് എൻ സ്കൂളിന്റെ മതിൽ കനത്ത മഴയെ തുടർന്ന് ഇടിഞ്ഞു വീണു. ഇതിന് സമീപത്ത് താമസിക്കുന്ന വിളയിൽ വീട്ടിൽ സജീവ് പിള്ളയുടെ വീടിന്റെ മതിലും കനത്ത മഴയെ തുടർന്ന് ഇടിഞ്ഞു വീണു.
