കോഴിക്കോട് : ജില്ലയുടെ മലയോര മേഖലകളില് കനത്ത മഴ. തോട്ടുമുക്കം പ്രദേശത്തെ തോടുകളില് മലവെള്ളപ്പാച്ചില് ശക്തമായി. ചേലൂപ്പാറ ക്വാറിക്ക് സമീപത്താണ് മലവെള്ള പാച്ചില് ഉണ്ടായത്. ക്വാറിക്ക് സമീപം ഉരുള്പൊട്ടിയതായാണ് സംശയം. ഇതിനെ തുടര്ന്നാവാം മലവെള്ളപ്പാച്ചില് എന്നാണ് കരുതുന്നത്. മലയുടെ മുകള് ഭാഗത്ത് ഉരുള്പൊട്ടിയതായാണ് സൂചന. അടുത്ത 3 മണിക്കൂറില് കേരളത്തിലെ എല്ലാ ജില്ലകളിലും ഒറ്റപ്പെട്ടയിടങ്ങളില് മിതമായ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് നല്കിയിരിക്കുന്ന മുന്നറിയിപ്പ്.
കഴിഞ്ഞ ദിവസങ്ങളില് വലിയ അളവില് മഴ ലഭിച്ച പ്രദേശങ്ങളില് മഴ തുടരുന്ന സാഹചര്യത്തില് താഴ്ന്ന പ്രദേശങ്ങള്, നദീതീരങ്ങള്, ഉരുള്പൊട്ടല്-മണ്ണിടിച്ചില് സാധ്യതയുള്ള മലയോര പ്രദേശങ്ങള് തുടങ്ങിയ ഇടങ്ങളിലുള്ളവര് അതീവ ജാഗ്രത പാലിക്കണമെന്ന് മുഖ്യമന്ത്രി ആവശ്യപ്പെട്ടു. സംസ്ഥാനത്തെ മഴക്കെടുതിയില് ഇതുവരെ മരിച്ചവരുടെ എണ്ണം 15 ആയി. 178 ദുരിതാശ്വാസ ക്യാമ്പുകള് സംസ്ഥാനത്ത് തുറന്നിട്ടുണ്ട്. 5168 പേരെയാണ് മാറ്റിപ്പാര്പ്പിച്ചത്. കനത്ത മഴയില് സംസ്ഥാനത്ത് മൂന്ന് വീടുകള് കൂടി പൂര്ണമായും, 72 വീടുകള് ഭാഗീകമായും തകര്ന്നു. ഇതോടെ പൂര്ണമായി തകര്ന്ന വീടുകളുടെ എണ്ണം 30 ആയെന്നും മുഖ്യമന്ത്രി പിണറായി വിജയന് അറിയിച്ചു.
