മന്ദമരുതി: ശബരിമല റോഡ് പദ്ധതിയിൽ ഉൾപ്പെടുത്തി വികസിപ്പിക്കുവാൻ ഫണ്ട് അനുവദിച്ച മന്ദമരുതി – കക്കുടുമൺ റോഡിന്റെ മന്ദമരുതി – സ്റ്റോറുംപടി വരെയുള്ള ഭാഗം വർഷങ്ങളായി പണികൾ തുടങ്ങാതെ കാൽനട യാത്ര പോലും ദുസഹമായി ഇരിക്കുകയാണ്. ഇതോടൊപ്പം സമീപത്തെ പാറമടയിൽ എത്തുന്ന അറുപതിൽ അധികം ടോറസ് ലോറികൾ ഓടുന്നത് മൂലം റോഡിൽ വലിയ കുഴികൾ രൂപപ്പെട്ടിരിക്കുകയാണ്. ഇതുമൂലം ചെറു വാഹനങ്ങളുടെയും കാൽനട യാത്രയും ദുസഹം ആയിരിക്കുന്നു.
സ്കൂൾ ബസ്സുകളും ഓട്ടോറിക്ഷകളും അവിടേക്കുള്ള യാത്ര നിർത്തിയതോടെ പ്രദേശവാസികൾ ആകെ ദുരിതത്തിലാണ്. ഈ സാഹചര്യത്തിൽ മന്ദമരുതി – സ്റ്റോറുംപടി റോഡിലൂടെ ഭാര വാഹനങ്ങളുടെ യാത്ര നിരോധിക്കുവാൻ ആവശ്യമായ നടപടികൾ സ്വീകരിക്കണം എന്ന് അഭ്യർത്ഥിച്ച് പൊതുമരാമത്ത് വകുപ്പ് മന്ത്രി, പിഡബ്ല്യൂഡി ഉദ്യോഗസ്ഥർ, ഗ്രാമ പഞ്ചായത്ത് സെക്രട്ടറി എന്നിവർക്ക് നൽകിയ പരാതിയിൽ കോൺഗ്രസ് മണ്ഡലം പ്രസിഡന്റ് പ്രമോദ് മന്ദമരുതി ആവശ്യപ്പെട്ടു.
